લીલા મરચાનું અથાણું ભોજનનો સ્વાદ બમણો કરી દે છે. જ્યારે ઘરમાં શાક ન હોય અથવા કંઈક તીખું-ચટપટું ખાવાનું મન થાય, ત્યારે આ અથાણું બેસ્ટ ઓપ્શન છે.
મીડિયમ તીખા લીલા મરચા, રાઈના કુરિયા, હળદર, વરિયાળી, મીઠું, તેલ, લીંબુનો રસ
સૌ પ્રથમ મરચાને પાણીથી બરાબર ધોઈ લો. ધોયા પછી તેને કોટનના કપડાથી એકદમ કોરા કરી લો. યાદ રાખો કે મરચામાં સહેજ પણ પાણીનો અંશ રહેવો જોઈએ નહીં, નહિતર અથાણું બગડી શકે છે. જો મરચા લાંબા હોય તો તેના બે ટુકડા કરો અથવા વચ્ચેથી ચીરો (કાપો) પાડી લો.
એક મોટા વાસણમાં રાઈના કુરિયા, હળદર, મીઠું અને વરિયાળી લો. આ બધા સૂકા મસાલાને બરાબર મિક્સ કરી લો.
હવે તૈયાર કરેલા મસાલામાં લીંબુનો રસ અને તેલ ઉમેરો. બધું ફરી એકવાર બરાબર હલાવો જેથી મસાલો એકરસ થઈ જાય.
તૈયાર મસાલામાં કાપેલા લીલા મરચા ઉમેરો. મરચા અને મસાલાને એવી રીતે હલાવો કે જેથી દરેક મરચા પર મસાલાનું પડ વ્યવસ્થિત ચડી જાય.
આ અથાણાને ઢાંકીને 12 થી 15 કલાક માટે એક બાજુ રહેવા દો. વચ્ચે બે થી ત્રણ વાર તેને હલાવતા રહેવું જેથી મસાલો નીચે બેસી ન જાય.
તમારું ટેસ્ટી મરચાનું અથાણું તૈયાર છે! તમે તેને આ વાનગીઓ સાથે માણી શકો છો: ગરમાગરમ રોટલી કે પરાઠા,ગુજરાતી થેપલા,દાળ-ભાત સાથે સાઈડ ડિશ તરીકે
આ અથાણાને કાચની બરણીમાં ભરીને 3 થી 4 મહિના સુધી ફ્રિજમાં સુરક્ષિત રાખી શકાય છે. કાચની બરણીનો ઉપયોગ કરવાથી અથાણાનો સ્વાદ લાંબો સમય જળવાઈ રહે છે.
અવનવી રેસીપી માટે ગુજરાતી જાગરણ વાંચતા રહો.