5.5G Network details: ભારતમાં ટેલિકોમ ક્રાંતિ એક નવા જ પડાવ પર પહોંચી ગઈ છે. અત્યાર સુધી આપણે જે 5G નેટવર્ક વાપરતા હતા, તેનાથી પણ એક કદમ આગળ વધીને હવે 5.5G જેને 5G Advanced પણ કહેવાય છે તે દેશમાં દસ્તક આપવા જઈ રહ્યું છે. એરટેલ અને જીઓ જેવી દિગ્ગજ કંપનીઓ પસંદગીના શહેરોમાં આ સેવાનું ટેસ્ટિંગ અને લોન્ચિંગ કરવાની તૈયારીમાં છે. જો તમારા મનમાં પણ આ નવી ટેક્નોલોજીને લઈને સવાલો છે, તો ચાલો તેને સરળ ભાષામાં સમજીએ.
5.5G ટેક્નોલોજી શું છે?
5.5G એ 5G અને ભવિષ્યના 6G નેટવર્ક વચ્ચેનો એક મહત્વનો સેતુ છે. આ માત્ર ઇન્ટરનેટની સ્પીડ વધારવા પૂરતું મર્યાદિત નથી, પરંતુ તે નેટવર્કની ક્ષમતા, કનેક્ટિવિટીની સ્થિરતા અને એકસાથે હજારો ડિવાઇસને જોડવાની તાકાતમાં મોટો સુધારો કરે છે. આમાં AI, એડવાન્સ સોફ્ટવેર અને સ્માર્ટ એન્ટેના સિસ્ટમનો ઉપયોગ કરવામાં આવ્યો છે, જેથી યુઝર્સને અવિરત નેટવર્ક મળી રહે.
ઇન્ટરનેટ સ્પીડમાં કેટલો મોટો ઉછાળો આવશે?
જો આપણે સ્પીડની વાત કરીએ તો 5.5G અત્યારના નેટવર્ક કરતા ઘણું આગળ છે:
ડાઉનલોડ સ્પીડ: સામાન્ય 5Gમાં જ્યાં 1 Gbps સુધીની સ્પીડ મળે છે, ત્યાં 5.5Gમાં આ સ્પીડ વધીને 10 Gbps સુધી પહોંચી શકે છે.
અપલોડ સ્પીડ: તેની અપલોડ સ્પીડ પણ 1 Gbps સુધીની હોઈ શકે છે.
લેટન્સી: આ નેટવર્કમાં ડેટા ટ્રાન્સફરનો સમય ઘટીને માત્ર 1 મિલિસેકન્ડ થઈ જશે. આનાથી ઓનલાઇન ગેમિંગ, લાઈવ વિડીયો સ્ટ્રીમિંગ અને હાઈ-ક્વોલિટી વિડીયો કોલિંગમાં કોઈ જ લેગ જોવા નહીં મળે.
AI અને સ્માર્ટ ડિવાઇસ કનેક્ટિવિટી
આ નેટવર્કની સૌથી મોટી ખાસિયત એ છે કે તે AI આધારિત છે. AI નક્કી કરે છે કે કયા યુઝરને કયા સમયે વધુ ઇન્ટરનેટ ડેટા કે સ્પીડની જરૂર છે, જેનાથી નેટવર્ક ખોરવાતું નથી. આ ઉપરાંત, તે 'Passive IoT' ને સપોર્ટ કરે છે. એટલે કે, ખૂબ જ ઓછી બેટરીવાળા કે બેટરી વગરના સેન્સર્સ પણ આ નેટવર્ક સાથે જોડાઈ શકશે, જે સ્માર્ટ સિટી પ્રોજેક્ટ્સ માટે વરદાન સાબિત થશે.
શું તમારો વર્તમાન સ્માર્ટફોન 5.5G સપોર્ટ કરશે?
બધા જ 5G ફોનમાં આ સુવિધા નહીં ચાલે. 5.5Gનો લાભ લેવા માટે તમારા ફોનમાં લેટેસ્ટ અને પાવરફુલ પ્રોસેસર હોવું જરૂરી છે.
સ્નેપડ્રેગન 8 Gen 3 અથવા તેનાથી ઉપરના પ્રોસેસર, MediaTek ડાયમેન્સિટી 9300, 9400 કે તેનાથી નવા ચિપસેટ ધરાવતા પ્રીમિયમ સ્માર્ટફોનમાં પ્રોસેસર હોવું જરૂરી છે. જૂના અથવા બજેટ 5G સ્માર્ટફોન આ નવી ટેક્નોલોજીને પૂરી રીતે સપોર્ટ કરી શકશે નહીં.
ફોનમાં 5.5G કેવી રીતે એક્ટિવેટ કરવું?
જો તમારો ફોન આ સુવિધા સપોર્ટ કરતો હશે, તો તમારે કોઈ નવું સેટિંગ કરવાની કે નવું સિમ કાર્ડ ખરીદવાની જરૂર નથી. સ્માર્ટફોન બ્રાન્ડ્સ એક સામાન્ય સોફ્ટવેર અપડેટ (OTA) દ્વારા આ ફીચર આપશે.
તમારે માત્ર તમારા ફોનના સેટિંગ્સ ચેક કરવાના રહેશે: પહેલા ફોનના Settingsમાં જાઓ; પછી Mobile Network અથવા SIM Settings પર ક્લિક કરો.ત્યારબાદ Preferred Network Typeમાં જઈને 5G Auto ઓપ્શન સિલેક્ટ કરી રાખો. જ્યારે પણ તમારા વિસ્તારમાં 5.5G નેટવર્ક લાઈવ થશે, ત્યારે તમારો હેન્ડસેટ આપમેળે જ આ સુપરફાસ્ટ નેટવર્ક સાથે કનેક્ટ થઈ જશે.