Wpl 2026 Final: વિમેન્સ પ્રીમિયર લીગ 2026ની ફાઈનલ મેચમાં રોયલ ચેલેન્જર્સ બેંગ્લોરે દિલ્હી કેપિટલ્સને 6 વિકેટે હરાવીને ટાઈટલ જીતી લીધું છે. દિલ્હી કેપિટલ્સ માટે આ હાર અત્યંત પીડાદાયક હતી, કારણ કે ટીમ સતત ચોથી સીઝનમાં ફાઈનલમાં પહોંચી હોવા છતાં ખિતાબ જીતવામાં નિષ્ફળ રહી હતી.
મિત્રતાની અતૂટ મિસાલ: જ્યારે સ્મૃતિએ જેમીમાને સંભાળી
મેચ પૂરી થયા બાદ દિલ્હીની કેપ્ટન જેમીમા રોડ્રિગ્સ પોતાની ભાવનાઓ પર કાબૂ રાખી શકી નહીં અને મેદાન પર જ રડી પડી. આ જોઈને આરસીબીની કેપ્ટન સ્મૃતિ મંધાના જશ્ન છોડીને તરત જ પોતાની ખાસ મિત્ર જેમીમા પાસે દોડી ગઈ હતી. સ્મૃતિએ જેમીમાને ગળે લગાવી, તેનો ઉત્સાહ વધાર્યો અને પોતાની 'ઓરેન્જ કેપ' જેમીમાના માથા પર પહેરાવીને તેના ચહેરા પર સ્મિત લાવવાનો પ્રયાસ કર્યો. નોંધનીય છે કે, સ્મૃતિ મંધાનાએ તાજેતરમાં જ અંગત જીવનમાં લગ્ન તૂટવા જેવા મોટા પડકારોનો સામનો કર્યો છે. તે મુશ્કેલ સમયમાં જેમીમા વિદેશની લીગ છોડીને સ્મૃતિની સાથે રહી હતી. આજે જ્યારે જેમીમા હારથી તૂટી ગઈ હતી, ત્યારે સ્મૃતિએ સાચા મિત્રની ફરજ નિભાવી હતી.
મેચનો રોમાંચ: હાઈ-સ્કોરિંગ ફાઈનલ
દિલ્હી કેપિટલ્સે પ્રથમ બેટિંગ કરતા 20 ઓવરમાં 4 વિકેટે 203 રનનો વિશાળ સ્કોર ખડક્યો હતો.
- જેમીમા રોડ્રિગ્સ: 37 બોલમાં 57 રન (8 ચોગ્ગા)
- લોરા વોલ્વાર્ડટ: 44 રન
- ચિનેલ હેનરી: 15 બોલમાં અણનમ 35 રન
RCBનો પલટવાર
204 રનના લક્ષ્યાંકનો પીછો કરવા ઉતરેલી RCBની શરૂઆત નબળી રહી હતી. ગ્રેસ હેરિસ સસ્તામાં આઉટ થઈ ગઈ હતી, પરંતુ ત્યારબાદ કેપ્ટન સ્મૃતિ મંધાના અને જ્યોર્જિયા વોલ વચ્ચે 92 બોલમાં 165 રનની ઐતિહાસિક ભાગીદારી થઈ હતી. જ્યોર્જિયાએ 54 બોલમાં 79 રન ફટકાર્યા હતા. આરસીબીએ 19.4 ઓવરમાં 4 વિકેટ ગુમાવીને લક્ષ્યાંક હાંસલ કરી લીધો હતો.
દિલ્હીનું 'ચોકર્સ' ટેગ યથાવત
મેગ લેનિંગના ગયા બાદ જેમીમાને કેપ્ટન્સી સોંપવામાં આવી હતી, પરંતુ દિલ્હીનું નસીબ બદલાયું નહીં. સતત ચાર ફાઈનલ હાર્યા બાદ જેમીમા અને આખી ટીમ અત્યંત નિરાશ જણાઈ હતી. જોકે, શ્રેયંકા પાટિલ અને રાધા યાદવ જેવા ખેલાડીઓએ પણ મેદાન પર ખેલદિલી બતાવી જેમીમાને હસાવવાનો પ્રયાસ કર્યો હતો. આ ભાવનાત્મક પળોના વીડિયો સોશિયલ મીડિયા પર 'ક્રિકેટ ઈઝ ધ વિનર' કેપ્શન સાથે વાયરલ થઈ રહ્યા છે.