TMC અને શિવસેનામાં ઐતિહાસિક બળવો
આ મોટા રાજકીય ફેરફારનું મુખ્ય કારણ પશ્ચિમ બંગાળમાં મમતા બેનર્જીની તૃણમૂલ કોંગ્રેસ (TMC) અને મહારાષ્ટ્રમાં ઉદ્ધવ ઠાકરેની શિવસેનામાં થયેલો બળવો છે. TMC ના 28 લોકસભા સાંસદોમાંથી 20 સાંસદોએ બળવો કરીને 'નેશનાલિસ્ટ સિટિઝન્સ પાર્ટી ઓફ ઇન્ડિયા' (NCPI) નામનો નવો પક્ષ બનાવ્યો છે, જે હવે સીધો NDA ગઠબંધનનો હિસ્સો બનવા જઈ રહ્યો છે. બીજી તરફ, મહારાષ્ટ્રમાં ઉદ્ધવ ઠાકરેની પાર્ટીના 9 માંથી 6 સાંસદ પાટલી બદલીને એકનાથ શિંદેની શિવસેના સાથે જોડાવાની તૈયારી કરી રહ્યા છે.
કેવી રીતે બદલાયું લોકસભાનું ગણિત?
543 બેઠકો ધરાવતી લોકસભામાં 3 બેઠકો ખાલી છે, તેથી બે-તૃતીયાંશ બહુમતી માટે 360 સભ્યોનું સમર્થન જરૂરી છે. બળવાખોર TMC સાંસદોને ઉમેરતા, NDA પાસે કુલ 318 સાંસદો છે, જ્યારે વિપક્ષ પાસે 184 અને બિન-ગઠબંધન પક્ષો પાસે 38 સાંસદો છે. અગાઉ સરકારને 54 મતની જરૂર હતી, પરંતુ TMC ના 20 અને ઉદ્ધવ જૂથના 6 સંભવિત સાંસદોના આવવાથી આ અછત ઘટીને માત્ર 28 મતોની રહી જશે.
શું DMK નું સમર્થન બનશે નિર્ણાયક?
આ દરમિયાન એક મોટી રાજકીય ઘટના બની છે. તમિલનાડુની સત્તાધારી પાર્ટી DMK એ કોંગ્રેસ અને વિપક્ષી INDIA ગઠબંધન સાથેનો નાતો તોડી નાખ્યો છે. સૂત્રોના જણાવ્યા અનુસાર, સરકાર અને DMK વચ્ચે વાતચીત ચાલી રહી છે. જો DMK ની માંગણી સ્વીકારવામાં આવે, તો તેના 22 સાંસદોના સમર્થનથી NDA નો આંકડો 348 સુધી પહોંચી જશે, ત્યારબાદ બહુમતી માટે તેને માત્ર 6 વધુ મતની જરૂર પડશે. આ 6 મતો માટે ભાજપની નજર મહારાષ્ટ્રની એક પ્રાદેશિક પાર્ટી સહિત વિપક્ષી ગઠબંધનના અન્ય નાના પક્ષો પર છે.
રાજ્યસભાનું સમીકરણ, વન નેશન વન ઇલેક્શન
રાજ્યસભામાં પણ બે-તૃતીયાંશ બહુમતી માટે 164 મતોની જરૂર છે અને NDA પાસે 150 સાંસદો છે. જો અહીં પણ DMK ના 8 સાંસદોનું સમર્થન મળે તો આંકડો 158 થશે, અને સરકાર બહુમતીથી માત્ર છ મત દૂર રહેશે.
જો કેન્દ્ર સરકાર સંસદના બંને ગૃહોમાં આ જાદુઈ આંકડો મેળવવામાં સફળ રહે છે, તો આગામી સત્રમાં સીમાંકન બિલની વાપસી તો થશે જ, સાથે સાથે દેશમાં 'વન નેશન વન ઇલેક્શન' (One Nation One Election) જેવા મોટા અને કડક કાયદા લાગુ કરવાનો રસ્તો પણ સંપૂર્ણપણે સાફ થઈ જશે.