Aloo Paratha Recipe: સવારના ભાગદોડવાળા સમયમાં જો ગરમાગરમ આલુ પરાઠા ખાવાનું મન થાય, પણ લોટ બાંધવા અને સ્ટફિંગ કરવાની આળસ આવતી હોય, તો આ "લિક્વિડ આલુ પરાઠા" ઉત્તમ વિકલ્પ છે. તેને તમે બટેટાના મસાલેદાર પુડલા પણ કહી શકો છો. તે ખાવામાં ખૂબ જ સોફ્ટ, ટેસ્ટી અને બનાવવામાં એકદમ સરળ છે.
જરૂરી સામગ્રી:
- બાફેલા બટેટા: ૩ નંગ
- ઘઉંનો લોટ: ૧.૨૫ કપ
- પાણી: આશરે ૨.૨૫ કપ
- આદુ: ૧ ઇંચનો ટુકડો
- લીલા મરચાં: ૨ નંગ
- લીલા ધાણા: ૧/૪ કપ
- અજમો: ૧ ટીસ્પૂન
- સફેદ તલ: ૨ ટેબલસ્પૂન
- ૨ ટીસ્પૂન મીઠું
- ૧ ટીસ્પૂન આમચૂર પાઉડર
- ૨-૩ ટીસ્પૂન ચાટ મસાલો
- ૧ ચપટી હિંગ
- ૧ ચપટી હળદર
- ૨ ટીસ્પૂન ધાણાજીરું
- ૧ ટીસ્પૂન લાલ મરચું પાવડર
- તેલ અથવા ઘી
બનાવવાની રીત
- સૌથી પહેલા બાફેલા બટેટાની છાલ ઉતારી લો. બટેટાને હાથથી મેશ કરવાને બદલે ખમણીની મદદથી સરસ ખમણી લો, જેથી તેમાં મોટા ટુકડા ન રહે.
- તેની સાથે જ ૧ ઇંચ આદુના ટુકડાને પણ ખમણી લો.
- હવે ખમણેલા બટેટામાં ઝીણા સમારેલા લીલા ધાણા, લીલા મરચાં, અજમો, સફેદ તલ, મીઠું, આમચૂર પાવડર, ચાટ મસાલો, હિંગ, હળદર, ધાણાજીરું અને લાલ મરચું ઉમેરો.
- ત્યારબાદ તેમાં સવા કપ ઘઉંનો લોટ ઉમેરી બધું બરાબર મિક્સ કરી લો. જો લસણ-ડુંગળી ગમતા હોય તો તેની પેસ્ટ પણ ઉમેરી શકાય.
- હવે તેમાં થોડું-થોડું પાણી ઉમેરતા જઈને મધ્યમ ઘટ્ટ બેટર તૈયાર કરો. આ માપ પ્રમાણે આશરે સવા બે કપ જેટલું પાણી જોઈશે.
- હવે નોન-સ્ટિક તવાને ગેસ પર ગરમ કરવા મૂકો અને તેના પર થોડું ઘી કે તેલ લગાવો.
- જ્યારે બેટર તવા પર ફેલાવવાનું હોય ત્યારે ગેસની ફ્લેમ એકદમ લો રાખવી, જેથી બેટર સરળતાથી ફેલાઈ શકે.
- એક મોટો ચમચો ભરીને બેટર તવા પર રેડો અને હલકા હાથે ગોળ ફેલાવી દો.
- પછી પરાઠાને ફેલાવ્યા પછી ગેસની આંચ મીડિયમ કરી લો અને તેના પર ઢાંકણ ઢાંકીને દોઢ મિનિટ સુધી ચડવા દો.
- જ્યારે ઉપરની સપાટી એકદમ ડ્રાય થઈ જાય, ત્યારે ઉપર થોડું ઘી કે તેલ લગાવો અને ઉપરથી થોડા સફેદ તલ સ્પ્રિંકલ કરો.
- હવે પરાઠાની કિનારીઓ છોડાવીને તેને સાવધાનીપૂર્વક પલટાવી લો.
- બીજી બાજુ પણ ઢાંક્યા વગર મીડિયમ ફ્લેમ પર દોઢ થી બે મિનિટ જેવું સરસ ગોલ્ડન સ્પોટ્સ આવે ત્યાં સુધી શેકી લો.
- જો પરાઠાને વધુ ક્રિસ્પી બનાવવા હોય તો થોડીવાર ધીમા તાપે શેકવા.
- તૈયાર થયેલા ગરમાગરમ સોફ્ટ લિક્વિડ આલુ પરાઠાને ઠંડા, ઘટ્ટ અને ક્રીમી દહીં સાથે સર્વ કરો.
- આ સિવાય તમે તેને લીલી ચટણી, ટોમેટો કેચપ કે સવારની ગરમ ચા સાથે પણ માણી શકો છો. બાળકોના લંચ બોક્સ માટે આ એક હેલ્ધી અને ક્વિક રેસિપી છે!