Vadodara News: સંસ્કારી નગરી વડોદરા માટે આજનો દિવસ વિકાસની દ્રષ્ટિએ અત્યંત મહત્વનો સાબિત થવા જઈ રહ્યો છે. ગુજરાતના નાયબ મુખ્યમંત્રી હર્ષ સંઘવી આજે વડોદરાની મુલાકાતે છે, જ્યાં તેઓ શહેરની સુરક્ષા, વહીવટી સુવિધા અને જનકલ્યાણના વિવિધ પ્રોજેક્ટ્સનું લોકાર્પણ અને ખાતમુહૂર્ત કરશે. આશરે ₹511 કરોડથી વધુના ખર્ચે તૈયાર થયેલા અને આકાર લેનારા આ કામોથી વડોદરાની કાયાપલટ થશે.
શહેરની સુરક્ષામાં વધારો: કમાન્ડ એન્ડ કંટ્રોલ સેન્ટરનું ઉદ્ઘાટન
નાયબ મુખ્યમંત્રી હર્ષ સંઘવીના પ્રવાસની શરૂઆત સવારે 10:55 કલાકે પોલીસ ભવન ખાતેથી થશે. અહીં તેઓ અત્યાધુનિક સિટી લેવલ કમાન્ડ એન્ડ કંટ્રોલ સેન્ટરનું ઉદ્ઘાટન કરશે. આ સેન્ટર કાર્યરત થવાથી વડોદરા શહેરની ટ્રાફિક વ્યવસ્થા અને કાયદો-વ્યવસ્થા પર બાજ નજર રાખી શકાશે. ગુનાખોરી ડામવા અને ટેકનોલોજીના માધ્યમથી સુરક્ષા ચુસ્ત કરવા માટે આ સેન્ટર પાયાનું કામ કરશે.
નવલખી મેદાનમાં વિકાસનો મહાકુંભ: ₹507 કરોડના કામો
ત્યારબાદ બપોરે 11:10 વાગ્યે નાયબ મુખ્યમંત્રી નવલખી મેદાન ખાતે પહોંચશે. અહીં જિલ્લા વહીવટી તંત્ર દ્વારા આયોજિત ભવ્ય કાર્યક્રમમાં તેઓ ₹507 કરોડના વિવિધ વિકાસલક્ષી કામોનું લોકાર્પણ અને ખાતમુહૂર્ત કરશે. આ પેકેજમાં માર્ગ અને મકાન વિભાગ, પાણી પુરવઠા અને ગ્રામીણ વિકાસના મહત્વના પ્રોજેક્ટ્સનો સમાવેશ થાય છે, જે વડોદરાના છેવાડાના માનવી સુધી સુવિધાઓ પહોંચાડશે.
ચેરિટી ભવનની નવી ભેટ
મુલાકાતના અંતિમ તબક્કામાં બપોરે 12:35 વાગ્યે પોલો ગ્રાઉન્ડ સામે નવનિર્મિત ચેરિટી ભવનનું ઉદ્ઘાટન કરવામાં આવશે. અંદાજે ₹4.12 કરોડના ખર્ચે બનેલું આ ભવન ધાર્મિક અને સામાજિક ટ્રસ્ટોની વહીવટી કામગીરીમાં વેગ લાવશે. આ આધુનિક બિલ્ડિંગમાં તમામ જરૂરી સવલતો ઉપલબ્ધ કરાવવામાં આવી છે જેથી નાગરિકોને સરકારી કામકાજમાં સરળતા રહે.
આ પ્રસંગે વડોદરાના સ્થાનિક ધારાસભ્યો, મેયર, કલેક્ટર અને પોલીસ કમિશનર સહિતના ઉચ્ચ અધિકારીઓ ઉપસ્થિત રહેશે. હર્ષ સંઘવીની આ મુલાકાત વડોદરાના વિકાસને નવી ઊંચાઈ પર લઈ જનારી બની રહેશે.