RMC Election 2026: રાજકોટ મહાનગરપાલિકા ચૂંટણી 2026; 18 વોર્ડમાં 9.85 લાખથી વધુ મતદારો, 1014 મતદાન મથકો

રાજકોટ મહાનગરપાલિકાના કયા વોર્ડમાં કેટલા મતદારો

સ્થાનિક સ્વરાજ્યની સામાન્ય ચૂંટણીઓ-2026: આદર્શ આચારસંહિતા અમલમાં

રાજ્યની વિવિધ મહાનગરપાલિકાઓ, નગરપાલિકાઓ, જિલ્લા પંચાયતો અને તાલુકા પંચાયતોની સામાન્ય ચૂંટણીઓ જાહેર થતાંની સાથે જ આદર્શ આચારસંહિતા અમલી બની છે. તેના અસરકારક અમલીકરણ માટે જિલ્લા ચૂંટણી અધિકારી અને કલેક્ટર ડો. ઓમપ્રકાશના અધ્યક્ષસ્થાને ચૂંટણી પ્રક્રિયામાં સામેલ થનારા અધિકારીઓની એક બેઠક યોજાઈ હતી.

અધિક જિલ્લા ચૂંટણી અધિકારી એન.કે. મુછારે બેઠકમાં માહિતી આપતા જણાવ્યું હતું કે, રાજકોટ મહાનગરપાલિકા, રાજકોટ જિલ્લા પંચાયત, ગોંડલ નગરપાલિકા અને 11 તાલુકા પંચાયતો માટે 26 એપ્રિલે મતદાન અને 28 એપ્રિલે મતગણતરી યોજાશે. આ ચૂંટણી અન્વયે અમલી બનેલી આદર્શ આચારસંહિતાનું પાલન શાસક પક્ષ, તમામ રાજકીય પક્ષો અને સરકારી વિભાગોના અધિકારીઓ તથા કર્મચારીઓએ ફરજિયાતપણે કરવાનું રહેશે. મતદાન અને મતગણતરી અંગે રાજ્ય ચૂંટણી આયોગ દ્વારા સમય સમય પર જારી થનારા પ્રતિબંધક આદેશોનું પણ સૌએ અચૂક પાલન કરવાનું રહેશે. આ સમયગાળા દરમિયાન કોઈ પણ પ્રકારના વિકાસકામોના ખાતમુહૂર્ત કે લોકાર્પણ થઈ શકશે નહીં.

તમામ સરકારી અધિકારીઓ અને કર્મચારીઓની બદલી-બઢતી પર પ્રતિબંધ રહેશે. વર્ગ 3 અને 4ના કર્મચારીઓની રજા માટે જિલ્લા ચૂંટણી અધિકારીની મંજૂરી, જ્યારે વર્ગ 2 કે તેથી ઉપરની કક્ષાના અધિકારીઓની રજા માટે જિલ્લા ચૂંટણી આયોગની મંજૂરી લેવી ફરજિયાત છે.

કોઈ પણ પ્રકારના સભા-સરઘસ-રેલી પૂર્વમંજૂરી વગર યોજી શકાશે નહીં. ચૂંટણીના સમયગાળા દરમિયાન હથિયારબંધીનું ચુસ્તપણે પાલન કરવાનું રહેશે. લાઇસન્સધારી હથિયારધારકોએ તેમના હથિયારો સંબંધિત પોલીસ સ્ટેશનમાં જમા કરાવવાના રહેશે. મહાનગરપાલિકાની બસ, બેંકો, ATM સેન્ટર અને અન્ય કોઈ પણ જાહેર કે સરકારી કચેરી ખાતે લાગેલા સરકારી યોજનાઓના પોસ્ટર્સ તાત્કાલિક અસરથી દૂર કરવાના રહેશે. સોશિયલ મીડિયાના કોઈ પણ પ્લેટફોર્મ પર સરકારી યોજનાઓની પ્રસિદ્ધિ નહીં કરી શકાય.

સ્ટેટિક અને માઉન્ટેડ લાઉડસ્પીકરના ઉપયોગ માટે સંબંધિત અધિકારીની પૂર્વમંજૂરી લેવી ફરજિયાત છે. રાજ્ય સરકારના મંત્રીઓ કે રાજકીય પક્ષના ઉમેદવારો ચૂંટણી સંબંધિત વહીવટીતંત્ર સાથે વીડિયો કોન્ફરન્સ યોજી શકશે નહીં. ચૂંટણી કામગીરી સિવાય અન્ય કોઈ હેતુ માટે સરકારી વાહનોનો ઉપયોગ કરી શકાશે નહીં. રાજ્ય સરકારની યોજનાઓનો કોઈ પણ માધ્યમ મારફતે પ્રચાર-પ્રસાર કરવા પર સંપૂર્ણ પ્રતિબંધ રહેશે.

સમગ્ર ચૂંટણી પ્રક્રિયા દરમિયાન કોઈ પણ શૈક્ષણિક સમયપત્રકને અસર ન થાય તેની તકેદારી રાખવા સૂચના અપાઈ છે. ચૂંટણીલક્ષી ચોપાનિયાં, ભીંતચિત્રો, પોસ્ટર્સ, કટઆઉટ, હોર્ડિંગ્સ, બેનર્સ વગેરે લગાવવા પર પણ પ્રતિબંધ રહેશે, એમ અધિક જિલ્લા ચૂંટણી અધિકારી ઉમેર્યું હતું.

આ બેઠકમાં ડીસીપી જગદીશ બંગારવા, પ્રાદેશિક નગરપાલિકા નિયામક મહેશ જાની, ગોંડલના ડીવાયએસપી સમીરન ભારદ્વાજ, અધિક કલેક્ટર ઈલાબેન ચૌહાણ, રૂડાના સીઈઓ ગૌતમ મિયાણી, જિલ્લા ગ્રામ વિકાસ એજન્સીના નિયામક એ.કે. વસ્તાણી, પ્રાંત અધિકારીઓ, વિવિધ સરકારી વિભાગોના અધિકારીઓ તેમજ જિલ્લા સંકલન સમિતિના સભ્યો ઉપસ્થિત રહ્યા હતા.