મયુર ઠક્કર, Navsari News: નવસારી જિલ્લાના ગણદેવી તાલુકામાં પિતા-પુત્રીના પવિત્ર સબંધોને લાંછન લગાડતો એક ચોંકાવનારો કિસ્સો પ્રકાશમાં આવ્યો છે. જેમાં વિદેશથી પરત ફરેલા પિતાએ પોતાની જ 14 વર્ષની સગીર દીકરી પર દુષ્કર્મ આચર્યું છે.
આ મામલે ભોગ બનનાર સગીરાની માતાએ હિંમત દાખવીને ગણદેવી તાલુકા પોલીસ મથકમાં પોતાના જ પતિ વિરુદ્ધ ફરિયાદ નોંધાવી છે. જેના આધારે પોલીસે ગણતરીના કલાકોમાં હવસખોર પિતાને દબોચી લીધો છે.
આ અંગે પ્રાપ્ત વિગતો મુજબ, આરોપી પિતા આજથી બે વર્ષ પૂર્વે 2024માં જ દક્ષિણ આફ્રિકાથી વતન પરત ફર્યો હતો. અહીં તેણે પોતાની જ સગીર દીકરી પર દાનત બગાડી હતી.
અવારનવાર પિતા દીકરીને અડપલા કરતો હતો. ગત મહિને સગીરાની માતા નોકરી પર ગઈ હતી. આ સમયે ઘરે દીકરીની એકલતાનો લાભ લઈને પિતાએ મર્યાદા ઓળંગી હતી. પિતાએ 9 થી 11 મે દરમિયાન 3 દિવસ સુધી દીકરીની મરજી વિરુદ્ધ તેની સાથે અવારનવાર દેહ સબંધ બાંધ્યા હતા.
આટલું જ નહીં, પોતાનું પાપ છુપાવવા માટે પિતાએ પીડિત દીકરીને ગર્ભનિરોધક ગોળીઓ પણ ગળાવી હતી. તેમજ જો કોઈને આ બાબતે જાણ કરશે, તો જાનથી મારી નાંખવાની ધમકી આપી હતી. પિતાનું આ સ્વરૂપ જોઈને સગીર દીકરી આઘાતમાં સરી પડી હતી અને ગુમસુમ રહેતી હતી. આખરે 30 મેના રોજ દીકરીએ પોતાની માતાને આપવીતી જણાવી હતી.
આખરે દીકરી સાથે થયેલા આ ઘોર અન્યાય બાદ માતાએ સહેજ પણ સમય ગુમાવ્યા વિના ગણદેવી પોલીસ સ્ટેશનના દ્વાર ખખડાવ્યા હતા. પોલીસે ઘટનાની ગંભીરતાને સમજીને તુરંત જ દુષ્કર્મ તેમજ પોક્સો (POCSO) એક્ટની વિવિધ કલમો હેઠળ ગુનો નોંધી તપાસ હાથ ધરી હતી અને આરોપીને ઝડપી પાડ્યો હતો.
આ મામલે ભોગ બનનાર બાળકીની માતાએ પોલીસ તંત્રની ત્વરિત કામગીરી અને સહયોગની પ્રશંસા કરી હતી. આ સાથે જ તેમણે સરકાર સમક્ષ ન્યાયની ગુહાર લગાવતા જણાવ્યું કે, 'મારી દીકરી પર ગુજારવામાં આવેલા અત્યાચાર બદલ આરોપીને માત્ર સાત વર્ષની સામાન્ય સજા ન મળવી જોઈએ. આવા નરાધમને આજીવન કેદ અથવા ફાંસીની સજા થાય અને આ સમગ્ર કેસ ફાસ્ટ ટ્રેક કોર્ટમાં ચલાવી અમને વહેલી તકે ન્યાય અપાવવામાં આવે તેવી મારી નમ્ર વિનંતી છે.'