Ankleshwar GIDC purple smoke: ગુરુવારના રોજ અંકલેશ્વર GIDC વિસ્તારમાં અચાનક હવામાં જાંબલી રંગના ધુમાડા દેખાતા અચરજ સર્જાયું હતું. અંકલેશ્વર જીઆઈડીસી (GIDC) માં આવેલી ડાયનામીક કંપનીમાંથી નીકળેલા આ વિચિત્ર અને રંગીન ધુમાડાને કારણે આસપાસના વિસ્તારમાં લોકોમાં ભારે કુતૂહલ અને સાથે-સાથે ચિંતાનો માહોલ સર્જાયો હતો.
ફૂડ કલર યુનિટમાં થયું ફ્લેશ ફાયર
પ્રાથમિક માહિતી અનુસાર, આ ડાયનામીક કંપની ફૂડ કલર બનાવવાનું કામ કરે છે. કંપનીના ડ્રાયર વિભાગમાં અચાનક જ 'ફ્લેશ ફાયર' (આગ) ભભૂકી ઉઠી હતી. આ આગની ઘટનાના પરિણામે જ વાતાવરણમાં મોટી માત્રામાં રંગીન (જાંબલી) ધુમાડો ફેલાઈ ગયો હતો.
ત્વરિત કાર્યવાહીથી હોનારત ટળી
આ ઘટનાની જાણ થતાં જ કંપનીના સેફટી વિભાગે સફાળા જાગીને તાત્કાલિક કાર્યવાહી હાથ ધરી હતી અને સમયસૂચકતા વાપરીને પરિસ્થિતિને કાબૂમાં લઈ લીધી હતી. એક મોટા રાહતના સમાચાર એ છે કે, સદનસીબે આ ફ્લેશ ફાયરની ઘટનામાં કોઈ પણ પ્રકારની જાનહાનિ કે કોઈ વ્યક્તિને ઈજા પહોંચ્યાની માહિતી સામે આવી નથી.
આ પણ વાંચો
આ પણ વાંચો: Bharuch: કંથારિયામાં મસ્જિદ-મદરેસા સંચાલિત મકાનમાં ભીષણ આગ, ગેસ સિલિન્ડર બ્લાસ્ટ થતાં અફરાતફરી
ISH વિભાગ દ્વારા તપાસનો ધમધમાટ
આ સમગ્ર ઘટનાની ગંભીરતાને ધ્યાનમાં રાખીને, ઈન્ડસ્ટ્રીયલ સેફટી એન્ડ હેલ્થ (ISH) વિભાગના અધિકારીઓ હવે એક્શનમાં આવ્યા છે અને કડક તપાસ શરૂ કરી દીધી છે. આ અંગે અધિકારીઓએ સ્પષ્ટ જણાવ્યું હતું કે, ઘટના કયા કારણોસર બની તે સહિતના તમામ પાસાની અત્યંત ઊંડાણપૂર્વક તપાસ કરવામાં આવી રહી છે.
આ ઉપરાંત, આટલી મોટી ઔદ્યોગિક કંપની દ્વારા કામદારો અને પર્યાવરણ માટેના જરૂરી સલામતીના ધોરણોનું યોગ્ય રીતે પાલન કરવામાં આવતું હતું કે નહીં તેની પણ કડક ચકાસણી કરવામાં આવશે.