Sabarmati River Emptying: અમદાવાદની મધ્યમાંથી પસાર થતી સાબરમતી નદીમાં વાસણા બેરેજની સમારકામની કામગીરી શરૂ થવાની છે. જે માટે આગામી 15 એપ્રિલથી નદીને આંશિક રીતે ખાલી કરવામાં આવશે. વાસણા બેરેજના કુલ 30 માંથી 18 દરવાજાઓનું સમારકામ હાથ ધરવાનું હોવાથી આ નિર્ણય લેવામાં આવ્યો છે.
સાબરમતી નદી ખાલી કરવાની કામગીરી
આગામી 15 જૂન આસપાસ શરૂ થતા ચોમાસાને ધ્યાનમાં રાખીને આ કામગીરી 60 દિવસની અંદર પૂર્ણ કરવાનો લક્ષ્યાંક રાખવામાં આવ્યો છે. આ પ્રક્રિયાના ભાગરૂપે, અમદાવાદ મનપા દ્વારા 90 લાખથી 1 કરોડ લિટર જેટલું પાણી ડાઉનસ્ટ્રીમમાં છોડવામાં આવશે. મૂળ આયોજન મુજબ નદીને 1 એપ્રિલથી ખાલી કરવાની હોવાથી, 26 માર્ચથી જ ઉપરવાસમાંથી આવતો પાણીનો પુરવઠો બંધ કરી દેવામાં આવ્યો હતો.
નોંધનીય છે કે, જ્યારે સાબરમતી નદીનો પટ ખુલ્લો રહેશે, ત્યારે 2 થી 3 કિલોમીટરની ત્રિજ્યામાં રહેતા સ્થાનિક રહીશોને દુર્ગંધ અને અસુવિધાનો સામનો કરવો પડી શકે છે. ભૂતકાળની કામગીરીથી વિપરીત, આ વખતે નદીમાં કોઈ મોટા પાયે સફાઈ ઝુંબેશ હાથ ધરવામાં આવે તેવી શક્યતા નથી.
વાસણા બેરેજના દરવાજાનું સમારકામ
વાસણા બેરેજના 18 દરવાજા બદલવા અને તેના સમારકામ માટે અંદાજે 9 કરોડ રૂપિયાનો કોન્ટ્રાક્ટ આપવામાં આવ્યો છે. આ સમારકામની પ્રક્રિયા ખૂબ જ જટિલ અને તબક્કાવાર રીતે થશે. સાબરમતી નદી ખાલી થતા સુભાષ બ્રિજના વર્તમાન માળખાને હટાવીને નવા સ્પાનની કામગીરી પણ શરૂ કરવામાં આવશે.
આ પણ વાંચો: Ahmedabad: પ્રથમવાર યોજાશે દેશનો સૌથી મોટો 'કાંકરેજ ગૌ-મહાકુંભ': 200થી વધુ શ્રેષ્ઠ ગાયોનું પ્રદર્શન
વાસણા બેરેજ સમારકામની પ્રક્રિયા
- દરવાજા હટાવવા: ક્રેનની મદદથી દરવાજાઓને તેમના મિજાગરા (hinges) પરથી દૂર કરવામાં આવશે.
- સ્ટ્રક્ચરલ રિપેરિંગ: જો સ્ટ્રક્ચરમાં કોઈ પણ પ્રકારનું નુકસાન જણાશે, તો તેનું સ્થળ પર જ સમારકામ કરવામાં આવશે.
- અલ્ટ્રાસોનિક ટેસ્ટિંગ: દરવાજાની મજબૂતાઈ ચકાસવા માટે અલ્ટ્રાસોનિક ટેસ્ટિંગ હાથ ધરવામાં આવશે.
- પ્લેટ અને રિબ્સની મજબૂતી: ક્ષતિગ્રસ્ત થયેલી પ્લેટો અને રિબ્સનું સમારકામ કરી તેને વધુ મજબૂત બનાવવામાં આવશે.
- સીલ બદલવા: પાણીનું લીકેજ અટકાવવા માટે સાઈડ અને બોટમ સીલ સંપૂર્ણપણે બદલવામાં આવશે
આ ઉપરાંત દરવાજાઓની આવરદા અને ટકાઉપણું વધારવા માટે એન્ટી-કોરોઝન કોટિંગ (કાટ વિરોધી લેપ) લગાવવામાં આવશે. આ તમામ પ્રક્રિયા પૂર્ણ થયા બાદ દરવાજાઓને ફરીથી ઇન્સ્ટોલ કરવામાં આવશે, અને તેને કાર્યરત કરતા પહેલા તેનું સઘન ટેસ્ટિંગ કરવામાં આવશે.