Director Priyadarshan: ભારતીય સિનેમામાં જ્યારે પણ બેસ્ટ કોમેડી ફિલ્મોની વાત આવે ત્યારે 'હેરા ફેરી', 'ભૂલ ભુલૈયા' અને 'ગરમ મસાલા' જેવા નામ સૌથી પહેલા હોઠ પર આવે છે. આ ફિલ્મો પાછળ જે માસ્ટર માઈન્ડ છે તે છે દિગ્દર્શક પ્રિયદર્શન અને તેમના ફેવરિટ એક્ટર અક્ષય કુમાર. હવે આ જોડી 14 વર્ષના લાંબા અંતરાલ પછી 'ભૂત બંગલા' (Bhoot Bangla) ફિલ્મ સાથે પરત ફરી રહી છે. ચાહકોમાં આ ફિલ્મને લઈને ભારે ઉત્સાહ છે, ત્યારે પ્રિયદર્શને અક્ષય કુમાર સાથેના તેમના ખાસ સમીકરણો વિશે મન મૂકીને વાત કરી છે.
રસોડામાં માખણ હોય તો ઘી શોધવા ક્યાં જવું?
એક તાજેતરના ઇન્ટરવ્યુમાં જ્યારે પ્રિયદર્શનને પૂછવામાં આવ્યું કે તેઓ કેમ વારંવાર અક્ષય કુમાર, પરેશ રાવલ અને રાજપાલ યાદવ જેવા કલાકારોને જ કાસ્ટ કરે છે? ત્યારે તેમણે મલયાલમની એક કહેવત ટાંકીને ખૂબ જ રમુજી પણ સચોટ જવાબ આપ્યો. તેમણે કહ્યું, "મલયાલમમાં એક કહેવત છે કે જ્યારે તમારા રસોડામાં પૂરતું માખણ હોય, ત્યારે બહાર ઘી શોધવા જવાની જરૂર નથી."
આ પણ વાંચો
તેમનો કહેવાનો તાત્પર્ય એ હતો કે અક્ષય કુમાર તેમના માટે એક એવી સંપત્તિ છે જેમના પર તેઓ આંખ મીંચીને વિશ્વાસ કરી શકે છે. પ્રિયદર્શનના મતે, અક્ષય તેમના વિઝનને અને દ્રશ્યોની માંગને એટલી સારી રીતે સમજે છે કે તેમને સેટ પર બહુ સૂચનાઓ આપવાની કે સુધારા કરવાની જરૂર પડતી નથી.
'જાણીતા શેતાનો' પર વધુ ભરોસો
પ્રિયદર્શને વધુમાં ઉમેર્યું કે, "તમે જે શેતાનને જાણો છો તે અજાણ્યા દેવદૂત કરતા વધુ સારો હોય છે. અક્ષય, પરેશ રાવલ અને રાજપાલ યાદવ મારા 'જાણીતા શેતાનો' છે. મને ખબર છે કે મારે તેમની પાસેથી શું કામ લેવું છે અને તેઓ પણ જાણે છે કે મારે કયા પ્રકારનું પરફોર્મન્સ જોઈએ છે. આ કલાકારો મારા દ્રશ્યોને જીવંત કરી દે છે."
17 એપ્રિલે રિલીઝ થશે 'ભૂત બંગલા'
નોંધનીય છે કે અક્ષય કુમાર અને પ્રિયદર્શને અત્યાર સુધીમાં ૬ ફિલ્મોમાં સાથે કામ કર્યું છે, જેમાં 'હેરા ફેરી', 'ગરમ મસાલા', 'ભાગમ ભાગ', 'ભૂલ ભુલૈયા', 'દે દાના દાન' અને 'ખટ્ટા મીઠા' જેવી સુપરહિટ ફિલ્મો સામેલ છે. 'ભૂત બાંગ્લા' તેમની સાતમી ફિલ્મ હશે.
આ ફિલ્મનું નિર્માણ અક્ષય કુમાર, શોભા કપૂર અને એકતા કપૂર દ્વારા કરવામાં આવ્યું છે. આ ફિલ્મ 17 એપ્રિલ 2026 ના રોજ સિનેમાઘરોમાં રિલીઝ થશે. ફિલ્મને લઈને વધતા ક્રેઝને જોતા નિર્માતાઓએ 16 એપ્રિલના રોજ ફિલ્મના 'પેઇડ પ્રીવ્યૂ' રાખવાનું પણ નક્કી કર્યું છે. કોમેડી અને હોરરના મિશ્રણ વાળી આ ફિલ્મ ફરી એકવાર બોક્સ ઓફિસ પર જૂના રેકોર્ડ તોડશે તેવી અપેક્ષા સેવાઈ રહી છે.