Gujarat RTE Admission 2026-27: ગુજરાતમાં ગરીબ અને મધ્યમવર્ગના બાળકો માટે ખાનગી શાળાઓમાં મફત શિક્ષણ મેળવવાની તક એટલે કે RTE પ્રવેશ પ્રક્રિયાનો આજથી વિધિવત પ્રારંભ થઈ રહ્યો છે. આ વર્ષે પ્રક્રિયામાં કેટલાક મહત્વના ફેરફારો કરવામાં આવ્યા છે, જે વાલીઓ માટે જાણવા ખૂબ જરૂરી છે. આ અંગેનો સંપૂર્ણ અહેવાલ નીચે મુજબ છે:
ગુજરાત સરકારના શિક્ષણ વિભાગ દ્વારા રાઈટ ટુ એજ્યુકેશન (RTE) એક્ટ હેઠળ શૈક્ષણિક વર્ષ 2026-27 માટે પ્રવેશ પ્રક્રિયાની જાહેરાત કરવામાં આવી છે. રાજ્યની ખાનગી પ્રાથમિક શાળાઓમાં 25 ટકા અનામત બેઠકો પર ગરીબ અને મધ્યમવર્ગના વિદ્યાર્થીઓને ધોરણ-1 માં પ્રવેશ આપવા માટે આજથી એટલે કે શનિવારથી ઓનલાઈન રજિસ્ટ્રેશનનો પ્રારંભ થઈ રહ્યો છે. વાલીઓ 17 એપ્રિલ સુધી સત્તાવાર પોર્ટલ પર ફોર્મ ભરી શકશે.
બેઠકોની સંખ્યામાં ઘટાડો અને માધ્યમ મુજબ વિગતો
ચાલુ વર્ષે RTE હેઠળની બેઠકોમાં ગત વર્ષની સરખામણીએ ઘટાડો જોવા મળ્યો છે. ગત વર્ષે અંદાજે 94 હજાર બેઠકો હતી, જે આ વર્ષે ઘટીને 84 હજારથી વધુ થઈ છે.
- ગુજરાતી માધ્યમ: 41,411 બેઠકો
- અંગ્રેજી માધ્યમ: 40,262 બેઠકો
- હિન્દી માધ્યમ: 2,235 બેઠકો
- અન્ય માધ્યમ: 320 બેઠકો
ખાનગી શાળાઓમાં ગત વર્ષે થયેલા કુલ પ્રવેશના 25 ટકા લેખે આ બેઠકોની ફાળવણી કરવામાં આવી છે.
નિયમોમાં બે મોટા ફેરફાર: શિફ્ટ પસંદગી અને અગ્રતા ક્રમ
આ વર્ષની પ્રવેશ પ્રક્રિયામાં સરકારે બે મહત્વના ફેરફારો કર્યા છે જે વાલીઓ માટે ફાયદાકારક અને નોંધનીય છે:
- 1) પાળી (શિફ્ટ) પસંદ કરવાની તક: અત્યાર સુધી વાલીઓ માત્ર શાળા પસંદ કરી શકતા હતા, પરંતુ આ વખતે વાલીઓ પોતાની અનુકૂળતા મુજબ સવારની પાળી કે બપોરની પાળી (શિફ્ટ) પસંદ કરી શકશે.
- 2) પ્રાથમિકતાના ધોરણોમાં ફેરફાર: અગાઉ આંગણવાડીના બાળકોને અનામત કેટેગરીના બાળકો કરતા પહેલા અગ્રતા મળતી હતી. જોકે, આ વર્ષથી અનામત કેટેગરીના બાળકોને પ્રવેશમાં પ્રથમ અગ્રતા આપવાનું નક્કી કરવામાં આવ્યું છે.
જરૂરી ડોક્યુમેન્ટ્સ અને સાવચેતી
પ્રાથમિક શિક્ષણ નિયામકની કચેરીએ વાલીઓને અગાઉથી જ ડોક્યુમેન્ટ્સ એકત્ર કરવા માટે પૂરતો સમય આપ્યો હતો. ઓનલાઈન ફોર્મ ભરતી વખતે રહેઠાણનો પુરાવો, જાતિનો દાખલો, આવકનો દાખલો અને બાળકના જન્મના દાખલા જેવા જરૂરી કાગળો તૈયાર રાખવા અપીલ કરવામાં આવી છે. 17 એપ્રિલ બાદ કોઈ પણ ફોર્મ સ્વીકારવામાં આવશે નહીં.