EPF Advance Withdrawal Rules and Process: જો તમે નોકરીયાત છો અને કર્મચારી ભવિષ્ય નિધિ સંગઠન (EPFO) માં રોકાણ કરો છો, તો તમારા માટે એક મહત્વના સમાચાર છે. હવે તમારે લગ્ન પ્રસંગ કે બાળકોના ઉચ્ચ શિક્ષણ માટે પર્સનલ લોન લેવાની કે કોઈની પાસે હાથ ફેલાવવાની જરૂર નહીં પડે. EPFO એ સભ્યો માટે પીએફ ખાતામાંથી આંશિક ઉપાડ લેવાની પ્રક્રિયાને અત્યંત સરળ અને ઝડપી બનાવી દીધી છે. તાજેતરમાં જારી કરાયેલા એક જાગૃતિ વીડિયોમાં EPFO એ આ અંગેના નિયમો, શરતો અને ઓનલાઈન ક્લેમ કરવાની સ્ટેપ-બાય-સ્ટેપ માહિતી આપી છે.
કઈ જરૂરિયાતો માટે મળી શકે છે PF એડવાન્સ?
EPFO ના જણાવ્યા અનુસાર, પીએફ સભ્યો સામાજિક અને શૈક્ષણિક જરૂરિયાતો માટે પોતાના ખાતામાંથી આંશિક ઉપાડ કરી શકે છે. સભ્ય પોતાના વ્યક્તિગત લગ્ન માટે, અથવા તો પોતાના સંતાનો (પુત્ર/પુત્રી) તેમજ ભાઈ કે બહેનના લગ્ન માટે આ ફંડ ઉપાડી શકે છે. આ સાથે જ સભ્યો માટે બાળકોના મેટ્રિક પછીના એટલે કે ઉચ્ચ શિક્ષણના ખર્ચને પહોંચી વળવા માટે પણ આ સુવિધા ઉપલબ્ધ છે.
આંશિક ઉપાડ માટેની મુખ્ય શરતો અને મર્યાદા
પીએફ ખાતામાંથી લગ્ન કે શિક્ષણ માટે પૈસા ઉપાડતા પહેલાં કેટલીક ફરજિયાત શરતોનું પાલન કરવું જરૂરી છે:
7 વર્ષની ન્યૂનતમ સેવા
આ સુવિધાનો લાભ લેવા માટે કર્મચારીએ EPFO માં ઓછામાં ઓછું 7 વર્ષનું યોગદાન આપેલું હોવું જોઈએ. એટલે કે, 7 વર્ષની સર્વિસ પૂર્ણ થયા બાદ જ આ એડવાન્સ મળી શકે છે.
મહત્તમ 50% સુધીનો ઉપાડ
સભ્યો પોતાના કુલ યોગદાન (Employee Share) ના મહત્તમ 50% સુધીની રકમ જ એડવાન્સ તરીકે ઉપાડી શકશે.
માત્ર 3 વખત તક
કોઈ પણ પીએફ સભ્ય પોતાની સમગ્ર કારકિર્દી દરમિયાન વધુમાં વધુ 3 વખત આ કારણોસર એડવાન્સ મેળવી શકે છે.
PF એડવાન્સ ઉપાડવાની સ્ટેપ-બાય-સ્ટેપ ઓનલાઈન પ્રક્રિયા
હવે પીએફમાંથી પૈસા ઉપાડવાની પ્રક્રિયા સંપૂર્ણપણે ડિજિટલ થઈ ગઈ છે. તમે ઘરે બેઠા આ રીતે ક્લેમ કરી શકો છો:
સ્ટેપ 1 - KYC વેરિફિકેશન
સૌ પ્રથમ EPFO ના સત્તાવાર UAN પોર્ટલ પર લોગ-ઇન કરો. 'Manage' સેક્શનમાં જઈને તમારી KYC વિગતો તપાસો. તમારો આધાર કાર્ડ, પાન કાર્ડ (PAN) અને બેંક ખાતાની વિગતો યોગ્ય રીતે લિંક અને વેરિફાઇડ હોવી અનિવાર્ય છે.
સ્ટેપ 2 - ઓનલાઈન સર્વિસિસ
ત્યારબાદ 'Online Services' ટેબ પર જાઓ અને 'Claim (Form 31, 19, 10C)' વિકલ્પ પર ક્લિક કરો. અહીં તમારા બેંક ખાતાના છેલ્લા ડિજિટ નાખીને તેને વેરિફાય કરો અને 'Proceed for Online Claim' પર ક્લિક કરો.
સ્ટેપ 3 - ફોર્મ પસંદગી
જો તમે હાલમાં નોકરી ચાલુ ધરાવતા હોવ, તો આંશિક ઉપાડ માટે તમારે 'Form 31' (PF Advance) પસંદ કરવાનું રહેશે.
સ્ટેપ 4 - કારણ અને રકમ
ડ્રોપ-ડાઉન મેનૂમાંથી પૈસા ઉપાડવાનું યોગ્ય કારણ (જેમ કે લગ્ન અથવા શિક્ષણ) પસંદ કરો. ત્યારબાદ તમારે જેટલી રકમની જરૂર હોય તે આંકડો દાખલ કરો (જે તમારા હિસ્સાના 50% થી વધુ ન હોવો જોઈએ).
સ્ટેપ 5 - આધાર OTP દ્વારા સબમિશન
અંતમાં ઘોષણાપત્ર (Declaration) સ્વીકારો અને તમારા આધાર કાર્ડ સાથે લિંક થયેલા મોબાઈલ નંબર પર મોકલવામાં આવેલો OTP દાખલ કરો. OTP સબમિટ થતાં જ તમારો ક્લેમ રજિસ્ટર થઈ જશે અને તમને એક રેફરન્સ નંબર મળશે, જેનાથી તમે સ્ટેટસ ટ્રેક કરી શકશો.
નોકરીદાતાની મંજૂરી કે દસ્તાવેજોની જરૂર નથી
આ નવી વ્યવસ્થાની સૌથી મોટી ખાસિયત એ છે કે ડિજિટલ પ્રક્રિયા અંતર્ગત મોટાભાગના કિસ્સાઓમાં કર્મચારીએ કોઈ દસ્તાવેજો સબમિટ કરવા પડતા નથી. આ ઉપરાંત, આ ક્લેમ માટે કંપની અથવા નોકરીદાતા (Employer) ની મંજૂરીની પણ જરૂર રહેતી નથી. સરકારે પ્રક્રિયાને ઝડપી બનાવવા માટે તેને 'સ્વ-ઘોષણા' (Self-Declaration) આધારિત બનાવી છે.