Gold Silver Price Hike Today: સોના-ચાંદીના ભાવમાં આજે ઐતિહાસિક તેજી જોવા મળી છે. આંતરરાષ્ટ્રીય બજારમાં સોનાએ તમામ જૂના રેકોર્ડ તોડી નાખ્યા છે અને પીળી ધાતુના ભાવે એક નવી ટોચ સર કરી છે. વેનેઝુએલામાં સર્જાયેલા ભૂ-રાજકીય તણાવ અને અમેરિકામાં વ્યાજ દરોમાં ઘટાડાની શક્યતાઓને પગલે રોકાણકારો સુરક્ષિત રોકાણ તરફ વળ્યા છે, જેના કારણે સોનાના ભાવ આસમાને પહોંચ્યા છે.
સોનાનો ભાવ ₹1.42 લાખને પાર
આંતરરાષ્ટ્રીય બજારમાં સોનાનો ભાવ ઈતિહાસમાં પ્રથમ વખત $4,500 પ્રતિ ઔંસ (28.34 ગ્રામ) ની સપાટી વટાવી ગયો છે. ભારતીય ચલણ મુજબ ગણતરી કરીએ તો, આ ભાવ પ્રતિ 10 ગ્રામ ₹1,42,500 ના સ્તરે પહોંચી ગયો છે. સ્પોટ ગોલ્ડમાં 0.11% નો ઉછાળો નોંધાયો હતો અને તે $4,510.60 પ્રતિ ઔંસ પર ટ્રેડ થઈ રહ્યું હતું.
તેજી પાછળના મુખ્ય કારણો
ભૂ-રાજકીય તણાવ
વેનેઝુએલા અને અમેરિકા વચ્ચેનો તણાવ ચરમસીમાએ છે. વેનેઝુએલાના ઓઈલ ટેન્કરો પર અમેરિકાની નાકાબંધી, કેરેબિયન વિસ્તારમાં વધતી સૈન્ય ગતિવિધિઓ અને રાષ્ટ્રપતિ ડોનાલ્ડ ટ્રમ્પની કડક ચેતવણીઓના કારણે વૈશ્વિક બજારમાં અફરાતફરીનો માહોલ છે. આવા સમયે સોનું હંમેશા 'સેફ હેવન' (સુરક્ષિત રોકાણ) માનવામાં આવે છે.
આ પણ વાંચો
વ્યાજ દરમાં ઘટાડો
યુએસ ફેડરલ રિઝર્વ આગામી વર્ષે ફરીથી વ્યાજ દરોમાં ઘટાડો કરે તેવી પ્રબળ શક્યતા છે. જ્યારે વ્યાજ દરો ઘટે છે, ત્યારે સોના જેવી સંપત્તિઓમાં રોકાણ વધે છે.
MCX પર સોના-ચાંદીની સ્થિતિ
ભારતીય વાયદા બજાર (MCX) પર પણ જબરદસ્ત ઉછાળો જોવા મળ્યો છે. બુધવાર, 24 ડિસેમ્બરના રોજ બપોરે 2:15 વાગ્યા સુધીના આંકડા મુજબ:
સોનું: 5 ફેબ્રુઆરી 2026 ની એક્સપાયરી ધરાવતું સોનું 0.39% વધીને ₹1,38,417 પર ટ્રેડ થઈ રહ્યું હતું. દિવસ દરમિયાન તે ₹1,38,676 ની ટોચે પહોંચ્યું હતું.
ચાંદી: ચાંદીમાં પણ તોફાની તેજી છે. ચાંદીના ભાવમાં 1.42% નો ઉછાળો આવ્યો હતો અને ભાવ ₹3,110 વધીને ₹2,22,763 પ્રતિ કિલોગ્રામ પર પહોંચી ગયો હતો. ચાંદીનો ઓલ-ટાઈમ હાઈ ₹2,24,300 રહ્યો છે.
1979 પછીનું શ્રેષ્ઠ પ્રદર્શન
વર્ષ 2025 સોના-ચાંદી માટે સુવર્ણ વર્ષ સાબિત થયું છે. આ વર્ષે અત્યાર સુધીમાં સોનામાં 70% થી વધુ અને ચાંદીમાં 150% નો તોતિંગ વધારો નોંધાયો છે. 1979 બાદ બંને ધાતુઓ તેમના શ્રેષ્ઠ વાર્ષિક પ્રદર્શન તરફ આગળ વધી રહી છે. સેન્ટ્રલ બેંકો દ્વારા સતત સોનાની ખરીદી અને ગોલ્ડ ETF માં રોકાણનો પ્રવાહ આ તેજીને બળ આપી રહ્યો છે.
ભાવ હજુ કેટલા વધશે? (Experts View)
ગાર્ડિયન વોલ્ટ્સ: જોન ફીનીના મતે, બજારમાં ફિઝિકલ ડિમાન્ડ મજબૂત છે અને આ તેજી અટકળો પર નહીં પરંતુ રોકાણકારોના વિશ્વાસ પર આધારિત છે.
ગોલ્ડમેન સૅક્સ: વૈશ્વિક નાણાકીય સંસ્થા ગોલ્ડમેન સૅક્સનું અનુમાન છે કે વર્ષ 2026 સુધીમાં સોનું $4,900 પ્રતિ ઔંસ સુધી પહોંચી શકે છે.
ઉલ્લેખનીય છે કે ચાંદીએ પણ $70 ની સપાટી કુદાવીને $72.70 નો નવો રેકોર્ડ બનાવ્યો છે, જ્યારે પ્લેટિનમ 1987 પછીના સૌથી ઉચ્ચતમ સ્તરે એટલે કે $2,300 ને પાર કરી ગયું છે.