DA News: સુપ્રીમ કોર્ટે કર્મચારીઓને આપવામાં આવતા મોંઘવારી ભથ્થા (DA) અંગે મહત્વનો નિર્ણય આપતા કહ્યું છે કે મોંઘવારી ભથ્થું કોઈ વધારાનો લાભ નથી પરંતુ તે લઘુત્તમ જીવનધોરણ જાળવવાનું એક સાધન છે.
સુપ્રીમ કોર્ટે મંજૂરી આપી
સુપ્રીમ કોર્ટે પશ્ચિમ બંગાળ રાજ્યના કર્મચારીઓના મોંઘવારી ભથ્થા મેળવવાના અધિકારને સમર્થન આપ્યું છે, જેમાં કહેવામાં આવ્યું છે કે એકવાર મોંઘવારી ભથ્થું કાયદાકીય નિયમો દ્વારા વ્યાખ્યાયિત થઈ જાય અને ઓલ ઈન્ડિયા કન્ઝ્યુમર પ્રાઈસ ઇન્ડેક્સ (AICPI) સાથે જોડાઈ જાય પછી રાજ્ય ઓફિસ મેમોરેન્ડમ દ્વારા ગણતરીની પદ્ધતિ બદલી શકતું નથી.
રાજ્ય સરકારના લાખો કર્મચારીઓને રાહત આપતા સુપ્રીમ કોર્ટે પશ્ચિમ બંગાળ સરકારને વર્ષ 2008થી વર્ષ 2019ના સમયગાળા માટે મોંઘવારી ભથ્થું ચૂકવવાનો નિર્દેશ આપ્યો છે. સુપ્રીમ કોર્ટે કહ્યું કે આ કાયદેસર રીતે લાગુ કરી શકાય તેવો અધિકાર છે.
કોર્ટે રાજ્ય સરકારને 6 માર્ચ સુધીમાં તેના કર્મચારીઓને 25 ટકા DA ચૂકવવાનો આદેશ આપ્યો છે. ન્યાયમૂર્તિ સંજય કરોલ અને ન્યાયમૂર્તિ પ્રશાંત કુમાર મિશ્રાની ખંડપીઠ ગુરુવારે પશ્ચિમ બંગાળ સરકાર દ્વારા DAના આદેશને પડકારતી અરજી પર આ ચુકાદો આપ્યો.
કોર્ટે જણાવ્યું હતું કે રાજ્ય સરકારી કર્મચારીઓ આ નિર્ણય પ્રમાણે 2008-2019ના સમયગાળા માટે મોંઘવારી ભથ્થાના બાકી રકમ મેળવવા માટે હકદાર રહેશે. જોકે કોર્ટે એમ પણ જણાવ્યું હતું કે કર્મચારીઓ વર્ષમાં બે વાર મોંઘવારી ભથ્થા મેળવવા માટે હકદાર નથી.
DA શા માટે જરૂરી છે?
કોર્ટે પોતાના નિર્ણયમાં મોંઘવારી ભથ્થાની વિગતવાર ચર્ચા કરી હતી, જેમાં જણાવ્યું હતું કે મોંઘવારી ભથ્થું કલ્યાણકારી રાજ્ય દ્વારા તેના કર્મચારીઓને વધતી કિંમતોની પ્રતિકૂળ અસરોથી બચાવવા માટે પૂરી પાડવામાં આવતી વ્યવહારુ સુરક્ષા તરીકે કામ કરે છે. કોર્ટે જણાવ્યું હતું કે DA એ વધારાનો લાભ નથી પરંતુ જીવનધોરણનું લઘુત્તમ ધોરણ જાળવવાનું એક સાધન છે.