India Gold Import New Rules: દેશમાં સતત વધી રહેલી સોનાની આયાત પર અંકુશ મેળવવા અને વેપાર ખાધને નિયંત્રિત કરવાના હેતુથી કેન્દ્ર સરકારે એક મોટો અને મહત્વપૂર્ણ નિર્ણય લીધો છે. ડિરેક્ટોરેટ જનરલ ઓફ ફોરેન ટ્રેડ (DGFT) દ્વારા જારી કરવામાં આવેલી નવી સૂચના મુજબ, 'એડવાન્સ ઓથોરાઇઝેશન સ્કીમ' હેઠળ સોનાની આયાત માટેના નિયમો અત્યંત કડક બનાવી દેવામાં આવ્યા છે. આ પગલાને ઉદ્યોગ જગતમાં સોનાની આયાત પર સરકારની 'સર્જિકલ સ્ટ્રાઈક' તરીકે જોવામાં આવી રહ્યો છે.
આયાત પર 100 કિલોની મર્યાદા નક્કી કરાઈ
વાણિજ્ય અને ઉદ્યોગ મંત્રાલય દ્વારા લેવાયેલા નિર્ણય મુજબ, હવેથી એડવાન્સ ઓથોરાઇઝેશન સ્કીમ હેઠળ કોઈપણ કંપની કે ઉત્પાદન એકમ વધુમાં વધુ 100 કિલોગ્રામ સોનાની જ આયાત કરી શકશે. સરકારના આ આદેશનો મુખ્ય ઉદ્દેશ્ય મોટા પાયે થતી આયાતને મર્યાદિત કરવાનો અને સોનાની આયાતના નામે થતા સંભવિત દુરુપયોગને અટકાવવાનો છે.
નવા એકમોનું ફિઝિકલ વેરિફિકેશન હવે ફરજિયાત
નિયમોમાં કરાયેલા ફેરફાર મુજબ, જે કંપનીઓ પ્રથમ વખત આ સ્કીમ હેઠળ પરવાનગી મેળવવા માંગતી હોય, તેમના માટે હવે 'ફિઝિકલ વેરિફિકેશન' ફરજિયાત રહેશે. પ્રાદેશિક સત્તાધિકારીઓ રૂબરૂ મુલાકાત લઈને ચકાસણી કરશે કે ફેક્ટરી ખરેખર અસ્તિત્વ ધરાવે છે કે નહીં, તેની ઉત્પાદન ક્ષમતા કેટલી છે અને તે કાર્યરત છે કે નહીં. આ પ્રક્રિયા બાદ જ આયાતની પરવાનગી આપવામાં આવશે.
આ પણ વાંચો
50 ટકા નિકાસનો લક્ષ્યાંક પૂર્ણ કરવો જરૂરી
સરકારે આયાત અને નિકાસ વચ્ચે સંતુલન જાળવવા માટે વધુ એક કડક શરત ઉમેરી છે. હવે પછીની સોનાની આયાત માટે મંજૂરી ત્યારે જ મળશે જ્યારે કંપનીએ તેની અગાઉની પરવાનગી હેઠળ સોંપવામાં આવેલી નિકાસ જવાબદારીના ઓછામાં ઓછા 50 ટકા જેટલો હિસ્સો પૂર્ણ કર્યો હોય. એટલે કે, નિકાસનો રેકોર્ડ બતાવ્યા વગર નવું સોનું આયાત કરવું હવે મુશ્કેલ બનશે.
દર 15 દિવસે રિપોર્ટિંગ અને CA પ્રમાણપત્ર
પારદર્શિતા વધારવા માટે DGFT એ મોનિટરિંગ મિકેનિઝમને વધુ સઘન બનાવ્યું છે. હવે આયાતકારોએ દર 15 દિવસે તેમનો પર્ફોર્મન્સ રિપોર્ટ સબમિટ કરવો પડશે. આ રિપોર્ટમાં આયાત અને નિકાસની તમામ વિગતો હોવી જોઈએ અને તે સ્વતંત્ર ચાર્ટર્ડ એકાઉન્ટન્ટ (CA) દ્વારા પ્રમાણિત હોવો પણ અનિવાર્ય છે.
આ ઉપરાંત, તમામ પ્રાદેશિક કચેરીઓએ માસિક ધોરણે DGFT મુખ્યાલયને એક સંકલિત અહેવાલ મોકલવો પડશે, જેમાં આયાત કરાયેલા સોનાના જથ્થા અને તેની સામે થયેલી નિકાસની સંપૂર્ણ વિગતો સામેલ હશે.