IPL 2027 Schedule Update: ભારતીય ક્રિકેટ કંટ્રોલ બોર્ડ (BCCI) એ અત્યારથી જ ઇન્ડિયન પ્રીમિયર લીગ (IPL) 2027 ને લઈને પોતાનું આયોજન શરૂ કરી દીધું છે. મળતી માહિતી અનુસાર, ખેલાડીઓને વધતી ગરમીથી રાહત આપવા માટે IPL ની 20મી સીઝન નિર્ધારિત સમય કરતાં થોડી વહેલી શરૂ થઈ શકે છે. બોર્ડ આગામી ટૂર્નામેન્ટ 10 માર્ચ 2027 થી 15 મે 2027 વચ્ચે યોજવા પર વિચાર કરી રહ્યું છે. આ ઉપરાંત, મેચોની સંખ્યાને લઈને પણ બોર્ડે મહત્વની સ્પષ્ટતા કરી છે.
IPL 2027 ક્યારથી શરૂ થશે?
BCCI સચિવ દેવજીત સૈકિયાએ PTI સાથેની વાતચીત દરમિયાન જણાવ્યું હતું કે, બોર્ડ IPL 2027 નું આયોજન 10 માર્ચથી 15 મે વચ્ચે કરવાનો પ્રયાસ કરી રહ્યું છે. આ નિર્ણય પાછળનું મુખ્ય કારણ મે અને જૂન મહિનામાં પડતી કાળઝાળ ગરમી છે. 15 મે પછી દેશના અનેક ભાગોમાં તાપમાન ખૂબ વધી જાય છે. આવા આકરા તડકા અને હીટવેવની ખેલાડીઓના સ્વાસ્થ્ય અને પ્રદર્શન પર સીધી અસર પડે છે, તેથી ટૂર્નામેન્ટ વહેલી પૂર્ણ કરવાનું આયોજન કરવામાં આવી રહ્યું છે.
VIDEO | BCCI secretary Devajit Saikia says IPL could start as early as March 10 and finish by May 15 from next season to avoid adverse weather during the business end of the tournament. No plans, however, to expand the IPL beyond its current 74 matches due to international… pic.twitter.com/zxjHJoGWE4
IPL 2027 માં કેટલી મેચ રમાશે?
છેલ્લા કેટલાક સમયથી ક્રિકેટ જગતમાં એવી અટકળો ચાલી રહી હતી કે આગામી સીઝનમાં મેચોની સંખ્યા 74 થી વધારીને 94 કરવામાં આવી શકે છે. જોકે, દેવજીત સૈકિયાએ આ તમામ અટકળો પર પૂર્ણવિરામ મૂક્યું છે.
તેમણે સ્પષ્ટ કર્યું કે BCCI નો હાલ મેચોની સંખ્યા વધારવાનો કોઈ ઇરાદો નથી. વર્તમાન સમયપત્રક અને સંજોગોને જોતા 94 મેચોનું આયોજન શક્ય નથી. આથી, IPL 2027 માં પણ અગાઉની સીઝનોની જેમ જ કુલ 74 મેચો જ રમાડવામાં આવશે અને બોર્ડ આ મુદ્દે કોઈ ફેરફાર કરવાનું વિચારતું નથી.
IPL 2026 માં ખેલાડીઓ ભીષણ ગરમીમાં રમ્યા
નોંધનીય છે કે, IPL 2026 ની સીઝન 28 માર્ચથી શરૂ થઈ હતી અને તેની ફાઇનલ મેચ 31 મેના રોજ રમાઈ હતી. મે મહિનાના અંત ભાગમાં દેશના ઘણા શહેરોમાં ભીષણ ગરમી જોવા મળી હતી, જેના કારણે ખેલાડીઓ થાકી ગયા હતા અને આયોજનમાં પણ કેટલીક મુશ્કેલીઓ પડી હતી. ગત સીઝનના આ જ અનુભવને ધ્યાનમાં રાખીને BCCI હવે આગામી ટૂર્નામેન્ટને ખેલાડીઓ માટે વધુ અનુકૂળ વાતાવરણમાં યોજવા માંગે છે.