IND vs ENG Under 19 World Cup 2026 Final: ભારતીય યુવા ક્રિકેટના ઉગતા સિતારા વૈભવ સૂર્યવંશીએ અંડર-19 વર્લ્ડ કપની ફાઇનલમાં ઈંગ્લેન્ડ સામે પોતાની બેટિંગથી ધમાકેદાર પ્રદર્શન કરીને વિશ્વભરનું ધ્યાન ખેંચ્યું છે. દબાણ હેઠળની આ હાઈ-વોલ્ટેજ મેચમાં વૈભવે માત્ર 32 બોલમાં અડધી સદી ફટકારીને ટીમ ઈન્ડિયાને વિસ્ફોટક શરૂઆત અપાવી હતી. આ શાનદાર ઇનિંગની સાથે જ વૈભવે ક્રિકેટ ઇતિહાસમાં એક મોટો વર્લ્ડ રેકોર્ડ પોતાના નામે કરી લીધો છે.
વર્લ્ડ કપ ફાઇનલનો સૌથી નાની ઉંમરનો ‘અર્ધશતકવીર’
વૈભવ સૂર્યવંશી હવે અંડર-19 વર્લ્ડ કપ ફાઇનલમાં પચાસથી વધુ રનનો સ્કોર બનાવનાર વિશ્વનો સૌથી નાની ઉંમરનો ખેલાડી બની ગયો છે. માત્ર 14 વર્ષની ઉંમરે આવી સિદ્ધિ મેળવવી એ અકલ્પનીય મનાય છે. રસપ્રદ વાત એ છે કે, વૈભવે માત્ર ફાઇનલમાં જ નહીં, પરંતુ સેમિફાઇનલમાં પણ અફઘાનિસ્તાન સામે 68 રનની મહત્વપૂર્ણ ઇનિંગ રમી હતી. આમ, સેમિફાઇનલ અને ફાઇનલ જેવી મોટી મેચોમાં સતત પર્ફોર્મન્સ આપીને તેણે પોતાની ક્ષમતા સાબિત કરી છે.
સંયમ અને આક્રમકતાનો અદભૂત સંગમ
વૈભવ સામાન્ય રીતે મેદાન પર ઉતરતાની સાથે જ આક્રમક શૈલીમાં બેટિંગ કરવા માટે જાણીતો છે. જોકે, ઇંગ્લેન્ડ સામેની ફાઇનલમાં તેણે પોતાની પરિપક્વતાનો પરિચય આપ્યો હતો. ટૂર્નામેન્ટની અગાઉની મેચોમાં તે પ્રથમ 10 ઓવરમાં ઉતાવળમાં પાંચ વખત આઉટ થયો હતો, પરંતુ ફાઇનલમાં તેણે રણનીતિ બદલી. શરૂઆતના 10 બોલમાં પિચની વર્તણૂક સમજી અને ત્યારબાદ ઇંગ્લેન્ડના બોલરો પર આક્રમણ કર્યું. તેણે પોતાની ઇનિંગમાં ત્રણ છગ્ગા અને છ ચોગ્ગા ફટકારીને પ્રેક્ષકોને મંત્રમુગ્ધ કરી દીધા હતા.
ટીમ ઈન્ડિયા માટે મજબૂત પાયો
વૈભવની આ ઇનિંગે ભારતને મેચમાં ઉપર હાથ અપાવ્યો છે. તેની કાર્યશૈલી અને મેદાન પરના આત્મવિશ્વાસને જોઈને ક્રિકેટ નિષ્ણાતો તેને ભારતીય ક્રિકેટનું ભવિષ્ય ગણાવી રહ્યા છે. વર્લ્ડ કપ જેવા મોટા મંચ પર 14 વર્ષના કિશોરનું આવું પ્રદર્શન ભારતીય ક્રિકેટની બેન્ચ સ્ટ્રેન્થ કેટલી મજબૂત છે તેની પ્રતીતિ કરાવે છે. વૈભવ સૂર્યવંશીની આ ઈનિંગે સાબિત કરી દીધું છે કે પ્રતિભા ઉંમરની મહોતાજ હોતી નથી. હવે ચાહકોની નજર આ યુવા ખેલાડીની આગામી સફર પર રહેશે.