PNG Connection New Rules: વર્તમાન વૈશ્વિક પરિસ્થિતિ અને મિડલ ઈસ્ટમાં વધતા તણાવને જોતા ભારત સરકારે પાઈપ્ડ નેચરલ ગેસ (PNG) ના નિયમોમાં મોટો ફેરફાર કર્યો છે. જો તમારા ઘરમાં પાઈપલાઈન દ્વારા ગેસ આવે છે, તો આ સમાચાર તમારા માટે ખૂબ જ મહત્વના છે.
શું છે નવો નિયમ?
પેટ્રોલિયમ અને પ્રાકૃતિક ગેસ મંત્રાલય દ્વારા બહાર પાડવામાં આવેલા નવા આદેશ અનુસાર, જે ગ્રાહકોના ઘરે PNG કનેક્શન કાર્યરત છે, તેઓ હવે પોતાના ઘરે LPG (રાંધણ ગેસનો બાટલો) રાખી શકશે નહીં. સરકારે સ્પષ્ટ કર્યું છે કે PNG સુવિધા ધરાવતા લોકોએ તેમનું જૂનું LPG કનેક્શન તાત્કાલિક સરેન્ડર કરવું પડશે. આ ઉપરાંત, હવેથી સરકારી તેલ કંપનીઓ કે ડિસ્ટ્રિબ્યુટર્સ આવા ગ્રાહકોને ગેસ સિલિન્ડરનું રિફિલિંગ પણ કરી આપશે નહીં.
નિયમ બદલવાનું કારણ: વૈશ્વિક કટોકટી
આ નિર્ણય પાછળનું મુખ્ય કારણ આંતરરાષ્ટ્રીય સ્તરે ઉભી થયેલી યુદ્ધ જેવી સ્થિતિ છે. 28 ફેબ્રુઆરીએ ઈઝરાયેલ અને અમેરિકાના ઈરાન પરના હુમલા બાદ હોર્મુઝ જળમાર્ગ બંધ થતા પેટ્રોલિયમ પેદાશોની સપ્લાય ખોરવાઈ છે.
આયાત પર નિર્ભરતા: ભારત તેની જરૂરિયાતનો 90% LPG આયાત કરે છે.
સપ્લાય ચેઈન: મિડલ ઈસ્ટમાં તણાવને કારણે સપ્લાયમાં અવરોધ આવતા સરકારે PNG ગ્રાહકો પર આ મર્યાદા લાદી છે જેથી જરૂરિયાતમંદ વિસ્તારોમાં LPG પુરવઠો જળવાઈ રહે.
સરકાર દ્વારા લેવાયેલા અન્ય પગલાં
પેટ્રોલિયમ મંત્રી હરદીપ સિંઘ પુરીએ સંસદમાં જણાવ્યું છે કે સરકાર પરિસ્થિતિને કાબૂમાં લેવા માટે તમામ પ્રયાસો કરી રહી છે:
વૈકલ્પિક દેશો: અમેરિકા, નોર્વે, કેનેડા અને રશિયા જેવા દેશો પાસેથી વધારાનો ગેસનો જથ્થો મંગાવવાની પ્રક્રિયા શરૂ છે.
ઉત્પાદનમાં વધારો: સ્થાનિક રિફાઈનરીઓને ઉત્પાદન વધારવા આદેશ અપાયા છે, જેનાથી ઘરેલુ ઉત્પાદનમાં 28% નો વધારો નોંધાયો છે.
ભાવમાં વધારો: માંગને નિયંત્રિત કરવા માટે તાજેતરમાં 7 માર્ચે 14.2 કિલોના સિલિન્ડરના ભાવમાં 7% નો વધારો કરવામાં આવ્યો છે.
સરકારનો આ નિર્ણય ગેસના સંસાધનોના યોગ્ય વિતરણ માટે લેવામાં આવ્યો છે. જો તમારી પાસે PNG કનેક્શન હોય, તો દંડ કે મુશ્કેલીથી બચવા માટે તમારે તમારું LPG કનેક્શન ગેસ એજન્સી પર જઈને જમા કરાવી દેવું જોઈએ.