Pariksha Pe Charcha 2026: વડાપ્રધાન નરેન્દ્ર મોદી આજે શુક્રવારે સવારે 10 વાગ્યે 'પરીક્ષા પે ચર્ચા' કાર્યક્રમ અંતર્ગત દેશભરના વિદ્યાર્થીઓ, વાલીઓ અને શિક્ષકો સાથે સીધો સંવાદ કરશે. બોર્ડની પરીક્ષાઓ પૂર્વે વિદ્યાર્થીઓનો આત્મવિશ્વાસ વધારવા અને પરીક્ષાના તણાવને દૂર કરવાના ઉદ્દેશ્ય સાથે યોજાતો આ કાર્યક્રમ આ વર્ષે નવા આયામો સ્થાપી રહ્યો છે.
Pariksha Pe Charcha Returns!
— PIB India (@PIB_India) February 5, 2026
PM @narendramodi's iconic student interactive session, Pariksha Pe Charcha (PPC), kicks off its 9th edition tomorrow, Friday, 6th February 2026, at 10 AM
Join to tackle exam stress and turn exams into a celebration – an Utsav of life! ✨
Read… pic.twitter.com/zUJycbCZ3m
પીએમ મોદીનો સંદેશ: તણાવમુક્ત રહેવાની જરૂરિયાત
કાર્યક્રમના એક દિવસ પૂર્વે વડાપ્રધાને સોશિયલ મીડિયા પ્લેટફોર્મ 'X' પર પોસ્ટ કરીને દેશના પ્રતિભાશાળી યુવાનો સાથે જોડાવા માટેનો ઉત્સાહ વ્યક્ત કર્યો હતો. તેમણે લખ્યું, "પરીક્ષા પે ચર્ચામાં પરીક્ષાઓ સંબંધિત ખૂબ જ રસપ્રદ વિષયો, ખાસ કરીને તણાવમુક્ત રહેવાની જરૂરિયાત અને શીખવા પર ભાર આપવા જેવા મુદ્દાઓ આવરી લેવામાં આવ્યા છે." વડાપ્રધાને આ કાર્યક્રમને પોતાનો પ્રિય પ્લેટફોર્મ ગણાવ્યો હતો.
રેકોર્ડબ્રેક ભાગીદારી
આ વર્ષે 'પરીક્ષા પે ચર્ચા' માટે નોંધણીના તમામ રેકોર્ડ તૂટી ગયા છે. સત્તાવાર આંકડાઓ અનુસાર, 45 મિલિયન (4.5 કરોડ) થી વધુ લોકોએ આ કાર્યક્રમ માટે રજિસ્ટ્રેશન કરાવ્યું છે. જો વિવિધ સંલગ્ન પ્રવૃત્તિઓમાં ભાગ લેનારા ઉમેદવારોને ઉમેરવામાં આવે, તો આ વર્ષે કુલ ભાગીદારી 67.6 મિલિયન (6.76 કરોડ) ને વટાવી ગઈ છે, જે આ કાર્યક્રમની વધતી જતી લોકપ્રિયતા દર્શાવે છે.
ગુજરાતના દેવમોગરા સહિત વિવિધ સ્થળોએ ઇન્ટરેક્ટિવ સત્રો
આ વર્ષનો કાર્યક્રમ વધુ સર્વસમાવેશક બનાવવામાં આવ્યો છે. દિલ્હીમાં પીએમ મોદીના સત્તાવાર નિવાસસ્થાન 7, લોક કલ્યાણ માર્ગ ઉપરાંત દેશના વિવિધ ભાગોમાં એકસાથે ઇન્ટરેક્ટિવ સત્રો યોજાશે. જેમાં ગુજરાતનું દેવમોગરા, તમિલનાડુનું કોઈમ્બતુર, છત્તીસગઢનું રાયપુર અને આસામનું ગુવાહાટી મુખ્ય કેન્દ્રો રહેશે, જ્યાંથી વિદ્યાર્થીઓ સીધા વડાપ્રધાન સાથે પ્રશ્નોત્તરી કરી શકશે.
OTT પ્લેટફોર્મ પર પણ પ્રસારણ
ડિજિટલ યુગમાં વધુને વધુ લોકો સુધી પહોંચવા માટે આ વર્ષે કાર્યક્રમનું પ્રસારણ માત્ર દૂરદર્શન કે સોશિયલ મીડિયા પર જ નહીં, પરંતુ લોકપ્રિય OTT પ્લેટફોર્મ જેવા કે SonyLIV, Amazon Prime Video અને ZEE5 પર પણ ઉપલબ્ધ રહેશે. વર્ષ 2018 માં શરૂ થયેલ 'પરીક્ષા પે ચર્ચા' અભિયાન હવે એક આંદોલન બની ગયું છે, જે વિદ્યાર્થીઓને પરીક્ષાને 'ભય' નહીં પણ 'ઉત્સવ' તરીકે જોવાની પ્રેરણા પૂરી પાડે છે.