Delhi Tughlakabad Fire News: દેશની રાજધાની દિલ્હીમાંથી એક અત્યંત દુખદ અને કાળજું કંપાવી દે તેવા સમાચાર સામે આવ્યા છે. દક્ષિણ દિલ્હીના ગીચ વસ્તી ધરાવતા તુગલકાબાદ એક્સટેન્શન વિસ્તારમાં આવેલી એક બહુમાળી ઇમારતમાં અચાનક ભીષણ આગ ફાટી નીકળી હતી. આ ભયાનક અગ્નિકાંડમાં ત્રણ લોકોના ઘટનાસ્થળે જ કરુણ મોત નિપજ્યા છે, જ્યારે આઠ જેટલા લોકો ગંભીર રીતે દાઝી જતાં ઘાયલ થયા હોવાના અહેવાલ મળ્યા છે.
મધ્યરાત્રિએ મચી અફરાતફરી મચી હતી
મળતી માહિતી મુજબ, દક્ષિણ દિલ્હીના તુગલકાબાદ એક્સટેન્શનના લેન નંબર 1 પર આવેલી એક રહેણાંક ઇમારતમાં આ આગ લાગી હતી. આગ એટલી ઝડપથી ફેલાઈ કે જોતજોતામાં આખી ઇમારતને પોતાની ઝપેટમાં લઈ લીધી હતી. ઘટનાને પગલે સમગ્ર વિસ્તારમાં ભારે અફરાતફરી અને નાસભાગ મચી ગઈ હતી. સ્થાનિક લોકોએ તાત્કાલિક આ અંગેની જાણ પોલીસ અને ફાયર વિભાગને કરી હતી.
ચેતવણી મળતાં જ દિલ્હી ફાયર સર્વિસ (DFS) ની ટીમો ઘટનાસ્થળે દોડી ગઈ હતી. ફાયર બ્રિગેડની અનેક ગાડીઓ અને અસંખ્ય જવાનોએ તાબડતોબ બચાવ કામગીરી શરૂ કરી દીધી હતી. સાંકડી ગલીઓ હોવાના કારણે શરૂઆતમાં ફાયર વિભાગને મુશ્કેલી પડી હતી, પરંતુ ભારે જહેમત બાદ આગ ઓલવવાનું અને લોકોને બહાર કાઢવાનું કામ યુદ્ધના ધોરણે શરૂ કરવામાં આવ્યું હતું.
8 લોકોને બચાવી AIIMS ખસેડાયા
ફાયર વિભાગના ઉચ્ચ અધિકારીઓના જણાવ્યા અનુસાર, અત્યાર સુધીમાં ઇમારતમાંથી આઠ ઘાયલોને સુરક્ષિત રીતે બહાર કાઢી લેવામાં આવ્યા છે. આ તમામ ઘાયલોની સ્થિતિ ગંભીર હોવાથી તેમને તાત્કાલિક સારવાર માટે એઇમ્સ (AIIMS) ટ્રોમા સેન્ટરમાં મોકલવામાં આવ્યા છે, જ્યાં ડોક્ટરોની ટીમ તેમની સારવાર કરી રહી છે.
દુર્ઘટનાની ગંભીરતાનો અંદાજ એ વાત પરથી લગાવી શકાય છે કે બચાવ કામગીરી દરમિયાન ટીમે ઘટનાસ્થળેથી ત્રણ લોકોના મૃતદેહ બહાર કાઢ્યા છે. આગમાં ગંભીર રીતે દાઝી જવાને કારણે આ ત્રણેય લોકોના મોત થયા છે. હાલમાં મૃતકોની ઓળખ કરવા માટેના પ્રયાસો પોલીસ દ્વારા હાથ ધરવામાં આવી રહ્યા છે.
5 લોકોનો આબાદ બચાવ થયો
આ મુશ્કેલ પરિસ્થિતિ વચ્ચે દિલ્હી ફાયર સર્વિસ (DFS) ના બહાદુર કર્મચારીઓએ પોતાનો જીવ જોખમમાં મૂકીને ઇમારતમાં ફસાયેલા પાંચ લોકોને બારીઓ અને ટેરેસના સહારેથી આબાદ બચાવી લીધા હતા. જો આ કર્મચારીઓએ સમયસર તકેદારી ન દાખવી હોત તો મૃત્યુઆંક હજુ પણ વધી શકતો હતો.
હાલમાં ઘટનાસ્થળે આગ સંપૂર્ણપણે કાબૂમાં લેવાના અને કૂલિંગ ઓપરેશનની પ્રક્રિયા ચાલી રહી છે. પ્રાથમિક દ્રષ્ટિએ આગ લાગવાનું કારણ શોર્ટ સર્કિટ હોવાનું મનાઈ રહ્યું છે, પરંતુ પોલીસ અને ફોરેન્સિક ટીમ દ્વારા આગ લાગવાના ચોક્કસ કારણો જાણવા માટે તપાસ શરૂ કરવામાં આવી છે. આ ઘટનાને પગલે સ્થાનિક રહીશોમાં ભારે શોક અને ફફડાટનો માહોલ જોવા મળી રહ્યો છે.