Delhi-Mumbai Expressway Opening Date: દેશના સૌથી મોટા અને મહત્ત્વાકાંક્ષી માર્ગ પ્રોજેક્ટ્સમાંનો એક ગણાતો લગભગ 1,386 કિલોમીટર લાંબો દિલ્હી-મુંબઈ એક્સપ્રેસવે હવે પૂર્ણ થવાના આરે છે. અહેવાલો અનુસાર, 20 જૂન પછી આ એક્સપ્રેસવેસંપૂર્ણ રીતે શરૂ થવાની શક્યતા વ્યક્ત કરવામાં આવી રહી છે. તેના શરૂ થતાં જ દિલ્હીથી મુંબઈ સુધીની મુસાફરીનો સમય નોંધપાત્ર રીતે ઘટીને આશરે 12 કલાકનો થઈ જશે.
અંદાજે 1 લાખ કરોડ રૂપિયાના ખર્ચે તૈયાર થયેલો આ પ્રોજેક્ટ દેશના સૌથી મોટા એક્સપ્રેસવેમાં સ્થાન ધરાવે છે. આ પ્રોજેક્ટની વિશેષતા એ છે કે તેમાં ભારતની પ્રથમ 8-લેન ટનલનો સમાવેશ થાય છે, જે ટાઇગર રિઝર્વની નીચે બનાવવામાં આવી છે.
ટાઇગર રિઝર્વની નીચે તૈયાર થઈ અનોખી 8-લેન ટનલ
આ પ્રોજેક્ટની સૌથી મોટી ખાસિયત રાજસ્થાનના કોટા નજીક નિર્માણ પામેલી લગભગ 4.9 કિલોમીટર લાંબી ટનલ છે. દેશની પ્રથમ 8-લેન ટનલ તરીકે ઓળખાતી આ સુવિધા મુકંદરા હિલ્સ ટાઇગર રિઝર્વની નીચેથી પસાર થાય છે. ટનલ બનાવવાનો મુખ્ય ઉદ્દેશ વન્યજીવોના કુદરતી રહેઠાણ અને તેમની અવરજવર પર ઓછામાં ઓછી અસર થાય તે સુનિશ્ચિત કરવાનો છે, જેથી વાહનવ્યવહાર જમીનની નીચેથી સરળતાથી ચાલી શકે. જરૂરી સુરક્ષા મંજૂરી મળ્યા બાદ આ ટનલ પણ વાહનો માટે ખુલ્લી કરવામાં આવશે.
ઘણા મહત્વપૂર્ણ શહેરો સાથે કનેક્ટિવિટી થશે વધુ મજબૂત
દિલ્હી-મુંબઈ એક્સપ્રેસવે ગુરુગ્રામ, જયપુર, કોટા, ઇન્દોર, વડોદરા, સુરત અને નવી મુંબઈ જેવા મુખ્ય શહેરોને સીધા અથવા ફીડર રોડ મારફતે જોડશે. આ પ્રોજેક્ટના અમલથી મુસાફરીનો સમય ઘટશે તેમજ માલસામાનના પરિવહનમાં લાગતો સમય અને ખર્ચ બંનેમાં ઘટાડો થશે.
મુસાફરી, વેપાર અને વિકાસને મળશે નવી દિશા
દિલ્હી-મુંબઈ એક્સપ્રેસવેનું કામ વર્ષ 2019માં શરૂ કરવામાં આવ્યું હતું. જમીન સંપાદન સહિતની કેટલીક પ્રક્રિયાઓને કારણે પ્રોજેક્ટ પૂર્ણ થવામાં ધાર્યા કરતાં વધુ સમય લાગ્યો, પરંતુ હવે તેનું કામ લગભગ પૂર્ણ થઈ ગયું છે. એક્સપ્રેસવે શરૂ થયા બાદ છ રાજ્યો વચ્ચેની કનેક્ટિવિટી વધુ સુદૃઢ બનશે અને હાલના નેશનલ હાઇવે પરનો ટ્રાફિકનો બોજ પણ ઓછો થશે.