summer travel: ઉનાળાની કાળઝાળ ગરમી અને રોજબરોજના વ્યસ્ત જીવનથી કંટાળીને લોકો અવારનવાર ઠંડા વિસ્તારોમાં જવાનું પસંદ કરે છે. સામાન્ય રીતે વેકેશનનું નામ પડતાં જ મનમાં શિમલા કે મનાલી જેવા પ્રખ્યાત હિલ સ્ટેશનોનો વિચાર આવે છે. પરંતુ, વેકેશનની સીઝનમાં આ સ્થળોએ પ્રવાસીઓની ભારે ભીડ ઉમટી પડે છે, જેના કારણે ટ્રાફિક જામ અને ઘોંઘાટનો સામનો કરવો પડે છે. જો તમે આ ઉનાળામાં ભીડભાડથી દૂર, શાંતિ અને ઠંડક સાથે તમારા પરિવાર સાથે યાદગાર પળો વિતાવવા માંગો છો, તો ભારતમાં એવા ઘણા અદ્ભુત સ્થળો છે જે કુદરતી સૌંદર્યથી ભરપૂર છે. પરિવાર સાથે આરામદાયક વેકેશન માણવા માટે ભારતના 6 શાંત અને ઠંડા સ્થળોની યાદી નીચે મુજબ છે:
મુનસ્યારી (ઉત્તરાખંડ)
ઉત્તરાખંડના કુમાઉ પ્રદેશમાં આવેલું મુનસ્યારી બરફથી ઢંકાયેલા પર્વતો અને લીલાછમ ઘાસના મેદાનો માટે જાણીતું છે. ટ્રેકિંગના શોખીનો અને પ્રકૃતિ પ્રેમીઓ માટે આ સ્થળ સ્વર્ગ સમાન છે. અહીંથી પંચાચુલીના ભવ્ય શિખરો સ્પષ્ટ દેખાય છે. આ ઉપરાંત, તમે બિર્થી ધોધ, પિથોરાગઢ કિલ્લો અને મિલમ ગ્લેશિયર ટ્રેકની મજા માણી શકો છો.
તીર્થન ખીણ (હિમાચલ પ્રદેશ)
શિમલા અને મનાલીની ભીડથી દુર, હિમાચલ પ્રદેશની તીર્થન ખીણ એક અત્યંત શાંતિપૂર્ણ સ્થળ છે. આ ખીણ 'ગ્રેટ હિમાલયન નેશનલ પાર્ક'ની નજીક આવેલી છે, જે જંગલો અને સુંદર નદીઓથી ઘેરાયેલી છે. તીર્થન નદીમાં ટ્રાઉટ ફિશિંગ, છોઈ વોટરફોલ સુધી ટ્રેકિંગ અને હિમાલયન નેશનલ પાર્કની સફર અદભુત અનુભવ કરાવે છે.
માવલીનોંગ (મેઘાલય)
મેઘાલયનું માવલીનોંગ ગામ આખા એશિયામાં 'સૌથી સ્વચ્છ ગામ' તરીકે પ્રખ્યાત છે. આ ગામની સુંદરતા તેની સ્વચ્છ શેરીઓ, હરિયાળી અને સ્થાનિક લોકોની સાદગીમાં છુપાયેલી છે. અહીં પ્રકૃતિ દ્વારા નિર્મિત 'લિવિંગ રૂટ બ્રિજ' આકર્ષણનું કેન્દ્ર છે. આ ઉપરાંત, સ્કાય વ્યુ પોઈન્ટ પરથી બાંગ્લાદેશનો સુંદર નજારો જોઈ શકાય છે.
ઝીરો ખીણ (અરુણાચલ પ્રદેશ)
અરુણાચલ પ્રદેશમાં આવેલી ઝીરો ખીણ ડાંગરના લીલાછમ ખેતરો, પાઈનના જંગલો અને તેની અનોખી આદિવાસી સંસ્કૃતિ માટે જાણીતી છે. ઉનાળામાં અહીંનું વાતાવરણ ખૂબ જ ઠંડુ અને આહલાદક હોય છે. અહીંની 'અપટાણી' જનજાતિના ગામડાઓની મુલાકાત લઈને સ્થાનિક સંસ્કૃતિને નજીકથી જાણી શકાય છે. પ્રકૃતિ પ્રેમીઓ માટે આ એક આદર્શ સ્થળ છે.
ધનાચુલી (ઉત્તરાખંડ)
જો તમે નૈનીતાલ જઈ રહ્યા હોવ અને ભીડથી બચવા માંગતા હોવ, તો તેની નજીક આવેલું ધનાચુલી એક નાનું અને અત્યંત મનોહર ગામ છે. ગાઢ ઓક અને પાઈનના જંગલો આ સ્થળની સુંદરતામાં ચાર ચાંદ લગાવે છે. જંગલોમાં શાંતિપૂર્ણ લટાર મારવી, હિમાલયના સુંદર દૃશ્યો જોવા અને સ્વાદિષ્ટ સ્થાનિક કુમાઓની ભોજનનો સ્વાદ માણવો અહીંનો મુખ્ય આનંદ છે.
સ્પિતિ ખીણ (હિમાચલ પ્રદેશ)
'નાનું તિબેટ' તરીકે ઓળખાતી સ્પિતિ ખીણ તેના ઊંચા પર્વતો, ઠંડા પવનો અને શાંત વાતાવરણ માટે પ્રખ્યાત છે. સાહસ અને અધ્યાત્મનો અનોખો સંગમ અહીં જોવા મળે છે. અહીં આવેલા પ્રાચીન તાબો મઠની મુલાકાત, ઊંચાઈવાળા વિસ્તારોમાં ટ્રેકિંગ અને તિબેટીયન સંસ્કૃતિ તેમજ ત્યાંની વાનગીઓનો અદ્ભુત અનુભવ પ્રવાસીઓને મંત્રમુગ્ધ કરી દે છે.
આ ઉનાળામાં પરંપરાગત અને ભીડભાડવાળા હિલ સ્ટેશનો પર જવાને બદલે, આ 6 અદભુત અને અજાણ્યા સ્થળોની મુલાકાત લો. આ સ્થળો તમને ગરમીથી રાહત તો આપશે જ, સાથે સાથે તમારા પરિવારને પ્રકૃતિ, સાહસ અને નવી સંસ્કૃતિનો એક અવિસ્મરણીય અનુભવ પણ કરાવશે.