Velvet Sofa Cleaning Tips: લિવિંગ રૂમની સુંદરતા વધારવામાં સોફા મહત્વપૂર્ણ ભૂમિકા ભજવે છે. ખાસ કરીને વેલ્વેટ સોફા તેના ભવ્ય દેખાવ અને નરમ પોતથી ઘરને એક વૈભવી અને આકર્ષક લુક આપે છે. જો કે, સમય જતાં તેના પર ધૂળ, ગંદકી અને ખાદ્યપદાર્થોના જિદ્દી ડાઘ જમા થવા લાગે છે, જેના કારણે તેની ચમક ઝાંખી પડી જાય છે.
મોટાભાગના લોકો વેલ્વેટ સોફાને સાફ કરવા માટે મોંઘા કેમિકલ પ્રોડક્ટ્સ અથવા પ્રોફેશનલ ડ્રાય ક્લીનિંગનો આશરો લેતા હોય છે, જે ખર્ચાળ સાબિત થાય છે. પરંતુ, તમે ઘરે જ કેટલાક સરળ ઉપાયો અને ટિપ્સ અપનાવીને તમારા વેલ્વેટ સોફાને નવા જેવો ચમકાવી શકો છો. ચાલો જાણીએ આ પાંચ સરળ ઘરેલું ઉપાયો વિશે:
ચા કે કોફીના ડાઘને તાત્કાલિક આ રીતે દૂર કરો
જો સોફા પર અકસ્માતે ચા અથવા કોફી ઢોળાઈ જાય, તો તે જગ્યાને ક્યારેય જોરથી ઘસવી નહીં. તેના બદલે, એક સ્વચ્છ અને સૂકું માઇક્રોફાઇબર કાપડ લો અને તેને ડાઘવાળી જગ્યા પર થોડી ક્ષણો માટે હળવેથી દબાવી રાખો. આ કાપડ પ્રવાહી અને ભેજને ઝડપથી શોષી લેશે, જેથી ડાઘ ફેલાશે નહીં અને ખૂબ જ હળવો થઈ જશે.
વેક્યુમ ક્લીનરની મદદથી ધૂળ સાફ કરો
જો તમારી પાસે વેક્યુમ ક્લીનર હોય, તો વેલ્વેટના ફેબ્રિકમાંથી ધૂળ-ગંદકી દૂર કરવી ખૂબ સરળ બની જાય છે. વેક્યુમ ક્લીનર સાથે સોફ્ટ બ્રશ એટેચમેન્ટ જોડો અને તેને આખા સોફા પર હળવા હાથે ફેરવો. સોફાની કિનારીઓ, ખૂણા અને સીમ વાળા ભાગ પર ખાસ ધ્યાન આપો, કારણ કે ત્યાં ધૂળ વધુ ભરાઈ રહે છે.
વેક્યુમ ક્લીનર વિના ધૂળ કેવી રીતે સાફ કરવી?
જો વેક્યુમ ક્લીનર ન હોય તો ચિંતા કરવાની જરૂર નથી. તમે સ્વચ્છ અને સૂકા માઇક્રોફાઇબર કાપડનો ઉપયોગ કરી શકો છો. કાપડને વેલ્વેટના રેસા જે દિશામાં નમેલા હોય તે તરફ હળવેથી ફેરવો. કાપડ બધી ધૂળને પોતાની તરફ ખેંચી લેશે. આ સિવાય તમે સોફ્ટ-બ્રિસ્ટલ બ્રશનો ઉપયોગ કરીને પણ ધૂળ ઝાપટી શકો છો.
પ્રવાહી સાબુના દ્રાવણથી ડાઘની સફાઈ
વેલ્વેટ ખૂબ જ નાજુક કાપડ હોવાથી તેના પર સામાન્ય ક્લીનર વાપરી શકાતા નથી. સામાન્ય ડાઘ દૂર કરવા માટે એક વાસણમાં પાણી લઈ તેમાં હળવા લિક્વિડ સોપના થોડા ટીપાં ઉમેરો. હવે માઇક્રોફાઇબર કાપડને આ મિશ્રણમાં સહેજ ભીનું કરો ધ્યાન રાખવું કે કાપડ વધુ પડતું ભીનું ન હોય અને ડાઘવાળા ભાગ પર હળવા હાથે ટેપ કરીને સાફ કરો.
કોર્નફ્લોર વડે તેલયુક્ત ડાઘની સફાઈ
સોફા પર લાગે તેલ કે ગ્રીસના જિદ્દી ડાઘ હટાવવા માટે કોર્નફ્લોર ઉત્તમ ઈલાજ છે. ડાઘ વાળા ભાગ પર થોડો કોર્નફ્લોર છાંટી દો અને તેને 20 થી 30 મિનિટ માટે છોડી દો. કોર્નફ્લોર તેલને શોષી લેશે. ત્યારબાદ નરમ બ્રશની મદદથી લોટને સાફ કરી લો. સફાઈ કર્યા પછી સોફાને કુદરતી હવામાં બરાબર સુકાવા દો.
સફાઈ કરતી વખતે ધ્યાનમાં રાખવાની બાબતો
- વેલ્વેટના કાપડને ક્યારેય પણ જોરશોરથી ઘસવું નહીં.
- કઠોર અને કેમિકલયુક્ત બ્લીચ કે ક્લીનર્સનો ઉપયોગ કરવાનું ટાળો.
- સખત કાંટાવાળા કે કડક બ્રશનો ઉપયોગ સોફાના ફેબ્રિકને ફાડી કે બગાડી શકે છે.
- સફાઈ દરમિયાન વધુ પડતા પાણીનો ઉપયોગ ન કરો, કારણ કે ભેજ મખમલને કાયમી નુકસાન પહોંચાડી શકે છે.