Iran Fires Missiles at Israel: અમેરિકા-ઈઝરાયલ ધરી અને ઈરાન વચ્ચે ચાલી રહેલા લોહિયાળ સંઘર્ષમાં આજે સ્થિતિ વધુ વણસી છે. ભૌગોલિક રાજકીય તણાવ ઘટાડવાના પ્રયાસો વચ્ચે, ઈરાને ઈઝરાયલના સૈન્ય અને ઉર્જા મથકોને નિશાન બનાવીને મિસાઈલો છોડતા સમગ્ર પશ્ચિમ એશિયામાં યુદ્ધના નગારા વાગી રહ્યા છે. આ સંઘર્ષની લપેટમાં હવે કુવૈત જેવા પાડોશી દેશો પણ આવી રહ્યા છે.
ઈઝરાયલ પર મિસાઈલ હુમલો અને કટોકટીની ચેતવણી
આજે વહેલી સવારે ઈઝરાયલી સૈન્યએ સમગ્ર દેશમાં ઇમરજન્સી એલર્ટ જારી કર્યું હતું. સૈન્ય પ્રવક્તાના જણાવ્યા અનુસાર, ઈરાન તરફથી ડઝનબંધ બેલેસ્ટિક મિસાઈલો ઈઝરાયલના પ્રદેશ તરફ છોડવામાં આવી છે. ઈઝરાયલની અત્યાધુનિક હવાઈ સંરક્ષણ પ્રણાલી (એરો અને ડેવિડ્સ સ્લિંગ) આ મિસાઈલોને હવામાં જ તોડી પાડવા માટે સક્રિય થઈ ગઈ છે. નાગરિકોને તાત્કાલિક બંકરોમાં આશરો લેવા અને સત્તાવાર નિર્દેશોનું પાલન કરવા સૂચના આપવામાં આવી છે.
ટ્રમ્પનો '5 દિવસનો વિરામ' અને ઈરાનનો વળતો પ્રહાર
રસપ્રદ વાત એ છે કે, આ હુમલા એવા સમયે થયા છે જ્યારે અમેરિકાના રાષ્ટ્રપતિ ડોનાલ્ડ ટ્રમ્પે સોમવારે જ જાહેરાત કરી હતી કે અમેરિકા આગામી પાંચ દિવસ સુધી ઈરાનના પાવર પ્લાન્ટ્સ અને ઉર્જા માળખા પર હુમલો કરવાનું ટાળશે. ટ્રમ્પે ઈરાનને હોર્મુઝ સ્ટ્રેટ (દરિયાઈ માર્ગ) ફરીથી ખોલવા માટે આપેલી સમયમર્યાદા પણ લંબાવી હતી. જોકે, ઈરાને આ વિરામને નકારીને મંગળવારે વહેલી સવારે બે અલગ-અલગ ઉર્જા સ્થળોને નિશાન બનાવ્યા હોવાના અહેવાલ છે.
કુવૈત પણ સંઘર્ષની લપેટમાં
માત્ર ઈઝરાયલ જ નહીં, કુવૈતે પણ દાવો કર્યો છે કે તેની હવાઈ સંરક્ષણ પ્રણાલીઓ અજાણ્યા ડ્રોન અને મિસાઈલ હુમલાઓનો સામનો કરી રહી છે. એક કલાકમાં બીજી વખત કુવૈતી સૈન્યએ લોકોને સલામતી જાળવવા વિનંતી કરી છે. આ ઘટનાક્રમ દર્શાવે છે કે યુદ્ધ હવે પ્રાદેશિક સ્તરે ફેલાઈ રહ્યું છે, જે વૈશ્વિક ઉર્જા પુરવઠા માટે મોટો ખતરો બની શકે છે.