Donald Trump: અમેરિકાના રાષ્ટ્રપતિ ડોનાલ્ડ ટ્રમ્પે ભારતની તેલ ખરીદીની વ્યૂહરચના અંગે એક અત્યંત મહત્વનું નિવેદન આપ્યું છે. ટ્રમ્પે જાહેરાત કરી છે કે ભારત હવે ઈરાન પરની પોતાની નિર્ભરતા ઘટાડીને વેનેઝુએલા પાસેથી તેલ ખરીદશે. આ માટે બંને દેશો વચ્ચે સમજૂતી થઈ હોવાનો સંકેત પણ તેમણે આપ્યો છે.
એરફોર્સ વન પરથી ટ્રમ્પનું નિવેદન
રાષ્ટ્રપતિ ટ્રમ્પે પોતાના સત્તાવાર વિમાન 'એરફોર્સ વન' પર પત્રકારો સાથે વાતચીત કરતા જણાવ્યું હતું કે, "અમે આ અંગેનો કરાર પહેલેથી જ કરી લીધો છે. ભારત હવે વેનેઝુએલા પાસેથી તેલ ખરીદવા તૈયાર છે અને તેઓ ઈરાન પાસેથી તેલ લેવાનું બંધ કરશે. અમે આ કરારના ખ્યાલ (Concept) ને પૂર્ણ કરી દીધો છે."
ચીનનું પણ કર્યું 'સ્વાગત'
ટ્રમ્પે માત્ર ભારત જ નહીં, પરંતુ ચીન અંગે પણ ઉદારતા બતાવી છે. તેમણે કહ્યું કે જો ચીન પણ વેનેઝુએલા પાસેથી તેલ ખરીદવા માંગતું હોય, તો અમે તેનું સ્વાગત કરીએ છીએ. ચીન તેલ માટે મોટો સોદો કરવા માટે આવી શકે છે. આ નિવેદન ટ્રમ્પની તેલ રાજનીતિમાં મોટા ફેરફારનો સંકેત આપે છે, જ્યાં તેઓ ઈરાન પર આર્થિક દબાણ વધારવા માંગે છે.
ભારત માટે આ સોદો કેમ મહત્વનો?
ભારત વિશ્વનો ત્રીજો સૌથી મોટો તેલ આયાતકાર દેશ છે. અત્યાર સુધી ભારત ઈરાન પાસેથી મોટા પ્રમાણમાં તેલ ખરીદતું આવ્યું છે, પરંતુ અમેરિકાના પ્રતિબંધોને કારણે ભારત માટે ઈરાન સાથે વેપાર કરવો મુશ્કેલ બની રહ્યો હતો. વેનેઝુએલા પાસે વિશ્વનો સૌથી મોટો તેલ ભંડાર છે. જો ભારતને ત્યાંથી સસ્તું તેલ મળે, તો તે ભારતીય અર્થતંત્ર માટે રાહતના સમાચાર બની શકે છે.
ભારત સરકારનું વલણ
રાષ્ટ્રપતિ ટ્રમ્પના આ દાવા અંગે ભારત સરકાર અથવા વિદેશ મંત્રાલય દ્વારા હજુ સુધી કોઈ સત્તાવાર પ્રતિક્રિયા આપવામાં આવી નથી. ભારત હંમેશા પોતાની ઉર્જા સુરક્ષા માટે સ્વાયત્ત નિર્ણયો લેતું આવ્યું છે, ત્યારે ટ્રમ્પનું આ નિવેદન આગામી દિવસોમાં મુત્સદ્દીગીરીના સ્તરે કેવી પ્રતિક્રિયા જન્માવે છે તે જોવું રહ્યું.