Gold ATM in China: વિશ્વમાં સૌથી વધુ સોનું ખરીદનારા દેશ તરીકે જાણીતા ચીનમાં અત્યારે કંઈક ઉલટું જોવા મળી રહ્યું છે. સોનાના ભાવ રેકોર્ડ ઊંચાઈએ પહોંચતા જ ચીની નાગરિકો માટે આ એક મોટી 'ગોલ્ડન તક' બની ગઈ છે. લોકો સોનું ખરીદવાને બદલે જૂના દાગીના વેચીને મોટો નફો બુક કરી રહ્યા છે. શાંઘાઈ જેવા મોટા શહેરોના મોલમાં હવે સોનું વેચવા માટે એટીએમ (ATM) જેવા અત્યાધુનિક રિસાયક્લિંગ મશીનો મુકાયા છે.
સોનું નાખો અને રોકડ મેળવો
શાંઘાઈના એક જાણીતા મોલમાં 'કિંગહુડ ગ્રુપ' નામની ટ્રેડિંગ ફર્મે સોનાના રિસાયક્લિંગ માટેનું ઓટોમેટિક મશીન લગાવ્યું છે. આ મશીન બિલકુલ એટીએમ જેવું દેખાય છે. લોકોએ માત્ર પોતાના દાગીના આ મશીનમાં નાખવાના હોય છે. મશીન આપમેળે સોનાનું વજન અને તેની શુદ્ધતા (Purity) તપાસે છે અને તે મુજબના નાણાં સીધા ગ્રાહકને ડિજિટલ સ્વરૂપે અથવા રોકડમાં મળી જાય છે.
રેકોર્ડ ભાવે વધારી ઉત્તેજના
ગત 29 જાન્યુઆરીના રોજ સોનાની કિંમત આંતરરાષ્ટ્રીય બજારમાં 5,600 ડોલરની નવી ઊંચાઈએ પહોંચી હતી. ભાવમાં થયેલા આ ધરખમ વધારાને કારણે લોકો દાયકાઓ પહેલા ખરીદેલું સોનું કાઢી રહ્યા છે. 54 વર્ષીય વુએ નામની મહિલાએ જણાવ્યું કે, તેણે તેના પિતા તરફથી વારસામાં મળેલી વીંટી આ મશીનમાં વેચી, જેના તેને 10,000 યુઆન (આશરે ₹1.3 લાખ) મળ્યા. નોંધનીય છે કે આ વીંટી તેની માતાએ દાયકાઓ પહેલા માત્ર 1,000 યુઆનમાં ખરીદી હતી.
મશીનો પર કલાકો સુધીની લાઈનો
સ્થાનિક રિપોર્ટ અનુસાર, આ ગોલ્ડ રિસાયક્લિંગ મશીન પાસે લોકો એક-એક કલાક સુધી લાઈનમાં ઉભા રહે છે. કંપનીએ ભીડને કાબૂમાં લેવા માટે ખાસ સ્ટાફ તૈનાત કર્યો છે. લોકો પોતાની દીકરીના જન્મ સમયે ખરીદેલા સિક્કા કે પૂર્વજો તરફથી મળેલી ભેટો પણ વેચી રહ્યા છે. વૃદ્ધો આ મશીનને તેમનું 'પેન્શન વધારનારું મશીન' ગણાવી રહ્યા છે.
ગ્રાહકોનો અનુભવ
ઝાઓ નામની એક યુવતી તેના દાદાએ 1950થી 1980ના દાયકા વચ્ચે ખરીદેલી વીંટી વેચવા આવી હતી. જ્યારે તેણે મશીનમાં વીંટી નાખી, ત્યારે ગણતરીની મિનિટોમાં સ્ક્રીન પર 12,000 યુઆનથી વધુની કિંમત દેખાઈ. લોકોનું માનવું છે કે ભાવ આટલા ઊંચા હોય ત્યારે સોનું વેચી દેવું એ જ સમજદારી છે.
ભારતની જેમ ચીનમાં પણ લગ્ન અને જન્મ જેવા પ્રસંગોએ સોનું ખરીદવાની પરંપરા છે, પરંતુ વર્તમાન મોંઘવારી અને સોનાના આસમાને પહોંચેલા ભાવે સામાન્ય ચીની નાગરિકોને નફો કમાવાની તક આપી છે. સોનાના વેચાણની આ પ્રક્રિયા ચીનના અર્થતંત્રમાં પણ નવી લિક્વિડિટી લાવી રહી છે.