25th Day Conflict: અમેરિકા, ઇઝરાયલ અને ઈરાન વચ્ચે ચાલી રહેલા યુદ્ધનો આજે 25મો દિવસ છે. ઇઝરાયલે લેબનોન અને પેલેસ્ટાઇનમાં મિસાઇલ હુમલા શરૂ કર્યા છે. આ હુમલા બાદ, ઇરાને ઇઝરાયલને ચેતવણી આપી છે.
ઈરાનના ઈસ્લામિક રિવોલ્યુશનરી ગાર્ડ કોર્પ્સ (IRGC)એ ઈઝરાયલને ચેતવણી આપી છે કે જો લેબનોન અને ગાઝામાં નાગરિકોને નિશાન બનાવવામાં આવશે તો તે ઈઝરાયલ સામે અનિયંત્રિત હુમલાઓ કરશે.
IRGC ગુપ્તચર મુખ્યાલય પર હુમલો
ઈઝરાયલી સૈન્યએ ઈરાનમાં રાત્રે હવાઈ હુમલા કર્યા હોવાનો દાવો કર્યો છે, જેમાં બેલિસ્ટિક મિસાઈલ સ્ટોરેજ સુવિધાઓ અને તેહરાનમાં અનેક સરકારી ઇમારતોને નિશાન બનાવવામાં આવી છે.
ઈઝરાયલી સૈન્યનું કહેવું છે કે હુમલાઓમાં તેહરાનમાં બે IRGC ગુપ્તચર મુખ્યાલય અને ઈરાનના ગુપ્તચર મંત્રાલય ધરાવતી એક ઇમારતનો સમાવેશ થાય છે.
ઇઝરાયેલમાં વરસાવીશું આગ
ઈરાનના IRGCએ ઇઝરાયલ પર આરોપ લગાવ્યો છે કે તે વર્તમાન યુદ્ધ જેવી પરિસ્થિતિનો ઉપયોગ કરીને લેબનોન અને પેલેસ્ટાઇનમાં નાગરિકો સામે મોટા પાયે હુમલાઓ કરી રહ્યું છે.
ઈરાનની IRNA ન્યૂઝ એજન્સી અનુસાર, IRGCએ કહ્યું કે જો ઇઝરાયલ આવા હુમલાઓ ચાલુ રાખશે, તો તે ઉત્તરી ઇઝરાયલ અને ગાઝા નજીકના વિસ્તારોમાં ઇઝરાયલી સૈનિકો સામે કોઈ ઉશ્કેરણી વિના, તીવ્ર મિસાઇલ અને ડ્રોન હુમલાઓ કરશે.
અમેરિકા દલદલમાં ફસાઈ રહ્યું છે
ઈરાનના ઇસ્લામિક રિવોલ્યુશનરી ગાર્ડ કોર્પ્સ (IRGC)ના વરિષ્ઠ અધિકારી અને તેહરાનના શક્તિશાળી એક્સપિડન્સી ડિસર્નમેન્ટ કાઉન્સિલના સભ્ય મોહસેન રેઝાઈએ પણ અમેરિકાને ચેતવણી આપી હતી.
મોહસેન રેઝાઈએ કહ્યું કે જો અમેરિકા ઈરાનના માળખા પર હુમલો કરશે, તો ઈરાન અરબી ખાડીમાં તેના જહાજો ડૂબાડી દેશે. સરકારી IRNA ન્યૂઝ એજન્સી અનુસાર, રેઝાઈએ કહ્યું- અમેરિકા બચાવવાની અંતિમ તારીખ નજીક આવી રહી છે અને અમેરિકા પાસે આ દલદલમાંથી બહાર કાઢવા માટે વધુ સમય બાકી નથી.
દરમિયાન, ઇઝરાયલે 28 ફેબ્રુઆરીથી ઇરાન પર કરવામાં આવેલા હુમલાઓની યાદી બહાર પાડી છે. IDFએ આ સમયગાળા દરમિયાન ઇરાનમાં 3,000થી વધુ લક્ષ્યોનો નાશ કરવાનો દાવો કર્યો છે. ઇઝરાયલે જણાવ્યું હતું કે ગઈકાલે રાત્રે આમાંથી 50 લક્ષ્યોનો નાશ કરવામાં આવ્યો હતો, જેમાં ઇરાનના બેલિસ્ટિક મિસાઇલ ડેપો અને લોન્ચિંગ સુવિધાઓનો સમાવેશ થાય છે.
યુએસ પ્રમુખ ડોનાલ્ડ ટ્રમ્પે ઈરાનમાં આદરણીય નેતા સાથે વાતચીત કરવાનો દાવો કર્યો છે અને હોર્મુઝ સ્ટ્રેટ ખોલવાની સમયમર્યાદા પણ પાંચ દિવસ લંબાવી છે. બીજી તરફ, ઈરાને ટ્રમ્પના દાવાને સંપૂર્ણપણે નકારી કાઢ્યો છે, અને કહ્યું છે કે તે ખોટા સમાચાર ફેલાવી રહ્યા છે. તેઓએ કોઈ વાતચીત કરી નથી.