Vadodara-Mumbai Expressway Connectivity: ગુજરાત અને મહારાષ્ટ્રના ઈન્ફ્રાસ્ટ્રક્ચરમાં ક્રાંતિ લાવવા જઈ રહેલા વડોદરા-મુંબઈ ગ્રીનફિલ્ડ એક્સપ્રેસ-વેની કનેક્ટિવિટી વિશે મહત્વની માહિતી સામે આવી છે. હવે વાપી, વલસાડ અને સેલવાસના વાહનચાલકો જુજવા, વંકાસ અને અથાલથી એક્સપ્રેસ વે પર સીધી એન્ટ્રી-એક્ઝીટ લઈ શકશે.
એક્સપ્રેસ-વે પર કુલ 10 ઇન્ટરચેન્જ-લિંક રોડની સુવિધા
વડોદરાથી મુંબઈના વિરાર સુધીનો વડોદરા-મુંબઈ એક્સપ્રેસ-વે સંપૂર્ણ રીતે ગ્રીનફિલ્ડ છે. આનો અર્થ એ છે કે આ એક્સપ્રેસ-વે નેશનલ હાઇવે 48 (NH-48) સાથે સળંગ જોડાયેલો નથી, પરંતુ વડોદરાથી વિરાર સુધીમાં કુલ 10 અલગ-અલગ સ્થળોએ ઇન્ટરચેન્જ અને લિંક રોડ મારફતે NH-48 સાથે તેને જોડવામાં આવ્યો છે. મોટા શહેર પાસે જ મુખ્ય ઇન્ટરચેન્જ હોવાથી વાહન ચાલકોને લાંબા અંતરની મુસાફરીમાં મોટી રાહત મળશે.
દક્ષિણ ગુજરાતના ઉદ્યોગો માટે આશીર્વાદરૂપ જોડાણ
દક્ષિણ ગુજરાતના ઔદ્યોગિક વિસ્તારોને ધ્યાનમાં રાખીને વાપી, વલસાડ અને દાદરા નગર હવેલી એમ ત્રણ સ્થળે એક્સપ્રેસ વેના ખાસ એન્ટ્રી અને એક્ઝિટ પોઇન્ટ આપવામાં આવ્યા છે. આ વિસ્તારમાં ઉદ્યોગોની સંખ્યા વધુ હોવાથી અવર-જવર માટે આ કનેક્ટિવિટી અત્યંત ઉપયોગી સાબિત થશે. વાહનચાલકોને નીચે મુજબના સ્થળોએથી એન્ટ્રી-એક્ઝીટ મળશે:
- વલસાડ: પૂર્વ ભાગમાં જુજવાથી (ધરમપુર ચોકડી તરફ) એન્ટ્રી-એક્ઝીટ અપાશે.
- વાપી: વાપી નજીક વંકાસ ખાતે નેશનલ હાઇવે 56 સાથે જોડાણ આપ્યું છે.
- દાદરા નગર હવેલી: સેલવાસ જવા માટે અથાલ ખાતે સ્ટેટ રોડ સાથે જોડાણ છે.
જોકે, સ્થાનિક લોકોએ હજુ થોડી રાહ જોવી પડશે, કારણ કે વલસાડ જિલ્લામાં એક્સપ્રેસ-વેની કામગીરી હાલ ઝડપથી ચાલી રહી હોવા છતાં, સમગ્ર કામ પૂર્ણ થતા હજુ એકથી દોઢ વર્ષ જેટલો સમય લાગી શકે છે.
વડોદરા, સુરત અને ભરૂચ માટે કનેક્ટિવિટી
વડોદરા-મુંબઈ એક્સપ્રેસ-વે પર અન્ય શહેરોને કઈ રીતે જોડવામાં આવ્યા છે તેની વિગતો આ મુજબ છે:
- વડોદરા: શરૂઆતમાં ફાજલપુર (નંદેસરી નજીક) ખાતે NH-48 અને NH-64 સાથે સીધો ઇન્ટરચેન્જ છે. ડોડકા ખાતે અમદાવાદ-વડોદરા એક્સપ્રેસ-વે સાથે અને સમિયાળા-લક્ષ્મીપુરા ખાતે અપ્રત્યક્ષ જોડાણ છે.
- ભરૂચ-અંકલેશ્વર: દહેજ નજીક લિંક રોડ દ્વારા કનેક્શન અપાયું છે.
- સુરત: મોટી નરોળી (કીમ નજીક) ખાતે NH-48 સાથે સીધો ઇન્ટરચેન્જ છે, જ્યારે પલસાણા અને બારડોલી માટે NH-53 મારફતે જોડાણ છે.
- નવસારી-વલસાડ પટ્ટો: ખારેલ ખાતે NH-48 થી આશરે 300 મીટર દૂર ઇન્ટરચેન્જ લિંક રોડ દ્વારા સીધો પ્રવેશ મળે છે.
- મહારાષ્ટ્ર: ગુજરાત-મહારાષ્ટ્ર બોર્ડરથી વિરાર સુધી આ એક્સપ્રેસ વે NH-48 ને સમાંતર (પેરેલલ) ચાલે છે અને વિરાર (પાલઘર) ખાતે મુંબઈ માટેનો મુખ્ય એન્ટ્રી પોઇન્ટ આપવામાં આવ્યો છે.
એકંદરે, આ પ્રોજેક્ટમાં સીધા NH-48 ઇન્ટરચેન્જ માટે 3 થી 4 સ્થળ અને લિંક રોડ મારફતે પરોક્ષ જોડાણ માટે 3 થી 4 સ્થળ એમ કુલ 6 થી 8 જેટલા મહત્વના કનેક્શન આપવામાં આવ્યા છે.