Panchmahal News: ગોધરા શહેરમાં ગુનાખોરી અને સંગઠિત અસામાજિક પ્રવૃત્તિઓ આચરતી કુખ્યાત ‘સિગ્નલ ફળીયા ગેંગ’ સામે પોલીસે લાલ આંખ કરી છે. કાયદો અને વ્યવસ્થાની સ્થિતિને વધુ મજબૂત બનાવવા માટે પોલીસે આ ગેંગ વિરૂદ્ધ ધી ગુજરાત કંટ્રોલ ઓફ ટેરરિઝમ એન્ડ ઓર્ગેનાઈઝ્ડ ક્રાઈમ (ગુજસીટોક) હેઠળ ગુનો નોંધીને કડક કાનૂની કાર્યવાહી હાથ ધરી છે. પોલીસ તપાસમાં બહાર આવ્યું છે કે, આ સંગઠિત ગેંગ વિરૂદ્ધ અત્યાર સુધીમાં અલગ-અલગ પોલીસ મથકોમાં કુલ 54 જેટલા ગંભીર ગુનાઓ નોંધાઈ ચૂક્યા છે.
તપાસમાં વધુ 8 આરોપીઓના નામ ખુલ્યા: 6ની ધરપકડ
ગુજસીટોક હેઠળ ગુનો દાખલ થયા બાદ પોલીસની વિવિધ ટીમોએ તપાસનો ધમધમાટ તેજ કર્યો હતો. આ ઊંડાણપૂર્વકની તપાસ દરમિયાન ગેંગ સાથે સંકળાયેલા વધુ આઠ આરોપીઓના નામ પ્રકાશમાં આવ્યા હતા. જેમાંથી પોલીસે ત્વરિત કાર્યવાહી કરીને છ નવા આરોપીઓને ઝડપી પાડવામાં સફળતા મેળવી છે, જ્યારે અન્ય બે આરોપીઓ પોલીસ પકડથી બચવા માટે હાલ ફરાર થઈ ગયા છે. ફરાર આરોપીઓને પકડી પાડવા માટે પોલીસે ચક્રો ગતિમાન કર્યા છે અને જુદી જુદી જગ્યાએ દરોડા પાડવામાં આવી રહ્યા છે.
મુખ્ય સાગરીત ખાલિદ ઉર્ફે ચકલાના રિમાન્ડ મંજૂર
આ ગેંગના મુખ્ય સાગરીતોમાંના એક એવા ખાલિદ ઉર્ફે ચકલાને પોલીસ દ્વારા કોર્ટમાં રજૂ કરવામાં આવ્યો હતો, જ્યાં કોર્ટે તેના રિમાન્ડ મંજૂર કર્યા છે. પોલીસ દફતરે ચોંટેલા ઇતિહાસ મુજબ, ખાલિદ સામે ભૂતકાળમાં વિવિધ પોલીસ સ્ટેશનોમાં આઠ જેટલા ગંભીર ગુનાઓ નોંધાયેલા છે. રિમાન્ડ દરમિયાન તેની પાસેથી ગેંગની અન્ય ગુનાહિત પ્રવૃત્તિઓ અને આર્થિક વ્યવહારોના રહસ્યો બહાર આવે તેવી પૂરી શક્યતા છે.
પાકિસ્તાન પ્રવાસ મુદ્દે કેન્દ્રીય એજન્સીઓ સક્રિય
આ સમગ્ર કેસમાં સૌથી ચોંકાવનારો વળાંક ત્યારે આવ્યો, જ્યારે આરોપીઓના પાકિસ્તાન પ્રવાસ અંગેની વિગતો સામે આવી. આ સંવેદનશીલ મુદ્દાને પગલે રાજ્ય અને કેન્દ્રની વિવિધ ગુપ્તચર તથા સુરક્ષા એજન્સીઓ સતર્ક થઈ ગઈ છે.
આરોપી ખાલિદ અને ગેંગના અન્ય સભ્યોના પાકિસ્તાન કનેક્શન તેમજ ત્યાંના પ્રવાસના મુખ્ય હેતુ અંગે વિવિધ એજન્સીઓ દ્વારા સંયુક્ત પૂછપરછ હાથ ધરવામાં આવી છે. આ પ્રવાસ પાછળ કોઈ રાષ્ટ્રવિરોધી ષડયંત્ર કે ભંડોળ (Funding) મેળવવાનો આશય હતો કે કેમ, તે દિશામાં પણ ઝીણવટભરી તપાસ ચાલી રહી છે. સ્થાનિક પોલીસ અને ઉચ્ચ એજન્સીઓની આ સંયુક્ત કાર્યવાહીથી ગોધરાના ગુનાહિત તત્વોમાં ભારે ફફડાટ વ્યાપી ગયો છે.