Narmada News: નર્મદા જિલ્લાના ડેડીયાપાડા સ્થિત જાનકી આશ્રમ ખાતે ગતરોજ સમાજના સર્વાંગી ઉત્થાન અને પ્રગતિ માટે એક મહત્વપૂર્ણ બેઠકનું આયોજન કરવામાં આવ્યું હતું. ભરૂચના સાંસદ મનસુખ વસાવાની અધ્યક્ષતામાં મળેલી આ બેઠકમાં મુખ્યત્વે શિક્ષણનો વ્યાપ વધારવા, યુવા પેઢીને વ્યસનના દૂષણોથી દૂર રાખવા અને સામાજિક એકતા મજબૂત કરવા પર વિશેષ ભાર મૂકવામાં આવ્યો હતો. આ આયોજન કોઈ રાજકીય પક્ષના બેનર હેઠળ નહીં, પરંતુ સમાજ સુધારણાના ઉમદા હેતુ સાથે કરવામાં આવ્યું હતું.
બેઠકના પ્રારંભે જિલ્લામાં વ્યાપી રહેલા વ્યસનના પ્રમાણ અને તેનાથી પરિવારો પર થતી માઠી અસરો અંગે ઊંડી ચિંતા વ્યક્ત કરવામાં આવી હતી. સાંસદ મનસુખ વસાવાએ ઉપસ્થિતોને સંબોધતા જણાવ્યું હતું કે, સમાજની સાચી પ્રગતિ ત્યારે જ શક્ય છે જ્યારે યુવાધન વ્યસનમુક્ત બને અને શિક્ષણ તરફ વળે. તેમણે વાલીઓને પણ પોતાના બાળકોના શિક્ષણ અને સંસ્કાર બાબતે વધુ જાગૃત રહેવા અપીલ કરી હતી.
બેઠક દરમિયાન વક્તાઓએ સામાજિક અને આર્થિક પછાતપણું દૂર કરવા માટે શિક્ષણને એકમાત્ર હથિયાર ગણાવ્યું હતું. યુવાનોને માત્ર ડિગ્રી પૂરતું મર્યાદિત ન રહીને સ્પર્ધાત્મક પરીક્ષાઓ અને કૌશલ્ય વર્ધન તરફ વાળવા માટે વિવિધ મુદ્દાઓ પર ચર્ચા થઈ હતી. સામાજિક એકતા જળવાઈ રહે અને પરસ્પર સહયોગથી સમાજમાં વ્યાપેલી કુરીતિઓ દૂર થાય તે માટે ચર્ચા કરવામાં આવી હતી.
આ કાર્યક્રમમાં ભરૂચના સાંસદ મનસુખ વસાવા ઉપરાંત માજી જિલ્લા પંચાયત પ્રમુખ પર્યુષાબેન વસાવા, માજી ધારાસભ્ય મોતીલાલ વસાવા અને માજી જિલ્લા પ્રમુખ શંકરભાઈ વસાવા ઉપસ્થિત રહ્યા હતા. જાનકી આશ્રમના પ્રમુખ સોનજીભાઈ વસાવા અને ઈશ્વરભાઈ વસાવાએ આશ્રમની પ્રવૃત્તિઓ અને સામાજિક સુધારણામાં તેના યોગદાન અંગે માહિતી આપી હતી. રણબુડા ગામના વતની અને જાણીતા બાસ્કેટબોલ કોચ હરેશ વસાવાએ રમતગમત દ્વારા યુવાનોના શારીરિક અને માનસિક વિકાસ અંગે માર્ગદર્શન પૂરું પાડ્યું હતું.
બેઠકના અંતે ઉપસ્થિત તમામ અગ્રણીઓ અને ગ્રામજનોએ સામાજિક જાગૃતિ લાવવા માટે સામૂહિક સંકલ્પ લીધો હતો. આ સંકલ્પમાં શિક્ષણને સર્વોચ્ચ પ્રાથમિકતા આપવી, ગામડાઓમાં વ્યસનમુક્તિ ઝુંબેશ ચલાવવી અને યુવાનોને સકારાત્મક પ્રવૃત્તિઓમાં જોડી રાષ્ટ્રનિર્માણમાં સહભાગી બનાવવાના મુદ્દાઓનો સમાવેશ કરવામાં આવ્યો હતો. સ્થાનિક સ્તરે રચનાત્મક ફેરફારો લાવવા માટે આ પ્રકારની બેઠકો ભવિષ્યમાં પણ ચાલુ રાખવાનો નિર્ણય લેવાયો હતો.