Mansa minor rape case: માણસામાં 15 વર્ષની સગીરાને લલચાવી-ફોસલાવીને દુષ્કર્મ આચરવાના ગંભીર ગુનામાં ગાંધીનગરની સ્પેશિયલ પોક્સો કોર્ટે મોટો ચુકાદો સંભળાવ્યો છે. કોર્ટે આરોપીને 20 વર્ષની સખત કેદની સજા ફટકારી છે, અને ભોગ બનનાર સગીરાને રૂપિયા 4 લાખનું વળતર ચૂકવવાનો આદેશ કર્યો છે.
શું હતી સમગ્ર ઘટના?
આ કેસની વિગતો મુજબ, ગત 26 ઓગસ્ટ 2021 ના રોજ આરોપી બિટ્ટુ કલ્પેશભાઇ દરજીએ માણસામાં ડી. ડી. પટેલ સ્કૂલ સામેથી 15 વર્ષ અને 9 માસની સગીરાને પોતાની જાળમાં ફસાવીને તેનું અપહરણ કર્યું હતું. ત્યારબાદ આરોપી સગીરાને પોતાની બાઈક પર બેસાડીને ગાંધીનગર હાઇવે પર આવેલ એક ગેસ્ટ હાઉસમાં લઈ ગયો હતો.
ગેસ્ટ હાઉસમાં આચર્યું દુષ્કર્મ
ગાંધીનગર હાઇવે પર આવેલી ગાયત્રી સોસાયટી સામેના રોયલ પેલેસ ગેસ્ટ હાઉસમાં આરોપીએ સગીરા પર બળજબરી પૂર્વક શારીરિક સંબંધ બાંધીને શરમજનક ગુનો આચર્યો હતો. આ ગંભીર મામલે પીડિતાની માતાએ માણસા પોલીસ મથકે ફરિયાદ નોંધાવ્યા બાદ પોલીસે કડક અને કાયદેસરની કાર્યવાહી હાથ ધરી હતી.
સરકારી વકીલની ધારદાર દલીલો
આ કેસની સુનાવણી ગાંધીનગરની સ્પેશિયલ પોક્સો કોર્ટમાં ચાલી રહી હતી. સુનાવણી દરમિયાન સરકારી વકીલ સુનિલ એસ. પંડ્યાએ કોર્ટ સમક્ષ મહત્વની દલીલો કરી હતી. તેમણે જણાવ્યું હતું કે, આરોપી એ વાત સારી રીતે જાણતો હતો કે સગીરાની ઉંમર નાની છે, તેમ છતાં તેણે આવું અધમ અને ગંભીર કૃત્ય આચર્યું છે.
સરકારી વકીલે કોર્ટને અપીલ કરી હતી કે સમાજમાં આવા ગુનાઓ રોકવા અને લોકોમાં કાયદાનો ભય સ્થાપિત થાય તે માટે આરોપીને મહત્તમ સજા થવી અત્યંત અનિવાર્ય છે.
સ્પેશિયલ પોક્સો કોર્ટનો ચુકાદો
ગાંધીનગરની સ્પેશિયલ પોક્સો કોર્ટના બીજા એડિશનલ સેશન્સ જજ એસ. વી. શર્માએ સરકારી વકીલની તમામ દલીલોને ગ્રાહ્ય રાખી હતી. કોર્ટે પોક્સો (POCSO) એક્ટ હેઠળ આરોપી બિટ્ટુ દરજીને 20 વર્ષની સખત કેદની સજાનો હુકમ કર્યો છે.
આ ઉપરાંત, કોર્ટે ભોગ બનનાર પીડિતાને કાનૂની સેવા સત્તા મંડળ મારફતે 4 લાખ રૂપિયાનું વળતર ચૂકવવા પણ આદેશ આપ્યો છે. આ ચુકાદાથી મહિલા અને બાળ સુરક્ષા મામલે કાયદાની કડકાઈ અને ન્યાયતંત્રની સક્રિયતા ફરી એકવાર સાબિત થઈ છે.