Saputara Car Accident: ગુજરાતના એકમાત્ર હિલ સ્ટેશન સાપુતારાથી એક ચિંતાજનક સમાચાર સામે આવ્યા છે. સાપુતારાના પ્રખ્યાત પ્રવાસન સ્થળ ટેબલ પોઇન્ટ (Table Point, Saputara) તરફ જતા અત્યંત સીધા અને જોખમી ઘાટ પર પ્રવાસીઓથી ભરેલી એક કાર પલટી મારી ગઈ હતી. અર્ટિગા કાર ચઢાણ ન ચઢી શકવાના કારણે રિવર્સમાં આવી ગઈ હતી અને ચાલકે કાબૂ ગુમાવતા આ અકસ્માત સર્જાયો હતો. આ ગમખ્વાર અકસ્માતમાં સુરતના એક જ પરિવારના બે માસૂમ બાળકો સહિત કુલ 7 પ્રવાસીઓ ઈજાગ્રસ્ત થયા છે. સદનસીબે આ ઘટનામાં કોઈ મોટી જાનહાનિ થઈ નથી અને તમામ મુસાફરોનો આબાદ બચાવ થયો છે.
વેકેશનની મજા સજામાં બદલાઈ: ઘાટ ચઢતી વખતે સર્જાયો અકસ્માત
મળતી માહિતી અનુસાર, હાલ ઉનાળુ વેકેશન ચાલી રહ્યું હોવાથી મોટી સંખ્યામાં સહેલાણીઓ ઠંડકનો અહેસાસ કરવા સાપુતારા ઉમટી રહ્યા છે. સુરતનો એક પરિવાર પણ રવિવારની રજા માણવા માટે અર્ટિગા કાર (Ertiga Car) લઈને સાપુતારા આવ્યો હતો. રવિવારે આ પરિવાર જ્યારે સાપુતારાના ફેમસ સ્પૉટ 'ટેબલ પોઇન્ટ' તરફ જઈ રહ્યો હતો, ત્યારે અચાનક આ દુર્ઘટના ઘટી હતી. ઘાટના તીવ્ર ચઢાણ પર કાર અચાનક આગળ વધી શકી નહોતી અને પાછળની તરફ સરકવા લાગી હતી. સ્ટીયરીંગ પરથી કાબૂ ગુમાવતા જ કાર રસ્તાની વચ્ચે જ પલટી ખાઈ ગઈ હતી.
સ્થાનિક લોકો અને પ્રવાસીઓ મદદે દોડ્યા, ઘાયલો હોસ્પિટલ ખસેડાયા
કાર પલટી મારતા જ ઘટનાસ્થળે ચીસાચીસ થઈ ગઈ હતી. જોકે, આસપાસ હાજર અન્ય પ્રવાસીઓ અને સ્થાનિક લોકોએ તાત્કાલિક સ્ફૂર્તિ દાખવીને બચાવ કામગીરી શરૂ કરી હતી. કારમાં ફસાયેલા તમામ સાતેય લોકોને સુરક્ષિત બહાર કાઢવામાં આવ્યા હતા. અકસ્માતમાં બે બાળકો સહિત 7 લોકોને નાની-મોટી ઈજાઓ થઈ હોવાથી, 108 એમ્બ્યુલન્સ મારફતે તમામ ઈજાગ્રસ્તોને તાત્કાલિક સાપુતારા નજીક આવેલા સામગહન સામુહિક આરોગ્ય કેન્દ્ર ખાતે સારવાર માટે ખસેડવામાં આવ્યા હતા.
પોલીસની ત્વરિત કામગીરી
ઘટનાની જાણ થતા જ સાપુતારા પોલીસનો કાફલો ઘટનાસ્થળે દોડી ગયો હતો. પોલીસે અકસ્માતગ્રસ્ત કારને હટાવીને ટ્રાફિક ક્લિયર કરાવ્યો હતો અને આગળની કાયદેસરની કાર્યવાહી હાથ ધરી છે.
ટેબલ પોઈન્ટનો ઘાટ કેમ છે આટલો ખતરનાક?
સ્થાનિક લોકોના જણાવ્યા મુજબ, ટેબલ પોઇન્ટ તરફ જતો ઘાટ રસ્તો અત્યંત સાંકડો છે અને તેનું ચઢાણ એકદમ સીધું (Steep Slope) છે. પૂરતો અનુભવ ન હોય તેવા ચાલકો માટે અહીં વાહન ચલાવવું મુશ્કેલ બને છે. આ પૂર્વે પણ આ વળાંક પર અનેક નાના-મોટા અકસ્માતો સર્જાઈ ચૂક્યા છે. સદનસીબે આ વખતે મોટી જાનહાનિ ટળતા પ્રવાસી પરિવાર સહિત વહીવટી તંત્રે પણ રાહતનો શ્વાસ લીધો છે.