Dahod Bypass Four Lane Project: દાહોદ શહેરમાં સતત વધતી જતી ટ્રાફિકની સમસ્યાને હળવી કરવા માટે રાજ્ય વહીવટીતંત્રે એક મોટો નિર્ણય લીધો છે. ઝાલોદ રોડ ઓવરબ્રિજથી લઈને ખરોડ બાયપાસ સુધીના 6 કિલોમીટર લાંબા રસ્તાને ફોર-લેન રોડ કોરિડોરમાં રૂપાંતરિત કરવાની કામગીરી શરૂ કરવામાં આવી છે.
રૂ. 35.52 કરોડના ખર્ચે બનશે ફોરલેન માર્ગ
આશરે રૂપિયા 35.52 કરોડના ખર્ચે નિર્માણ પામનાર આ ફોરલેન રસ્તો ઝાલોદ ઓવરબ્રિજ વિસ્તારને સીધો નેશનલ હાઇવે 56 (NH 56) સાથે જોડે છે. આ માર્ગ પર શાળાઓ, કોલેજો, અદાલતો અને વિવિધ સરકારી કચેરીઓ આવેલી હોવાથી તે દાહોદ શહેરના સૌથી વ્યસ્ત રસ્તામાંનો એક ગણાય છે.
દિલ્હી-મુંબઈ એક્સપ્રેસ-વે કનેક્ટિવિટી કેન્દ્રમાં
અધિકારીઓના જણાવ્યા અનુસાર, ચાલુ વર્ષના અંત સુધીમાં દિલ્હી-મુંબઈ એક્સપ્રેસ-વે ઓપરેશનલ (કાર્યરત) થવાની સંભાવના છે. ત્યારબાદ આ રૂટ પર વાહનોની અવરજવરમાં ભારે વધારો થવાની અપેક્ષા છે. ભવિષ્યની આ ટ્રાફિક જરૂરિયાતને ધ્યાનમાં રાખીને જ આ પ્રોજેક્ટનું આયોજન કરવામાં આવ્યું છે.
કેવો હશે આ નવો ફોરલેન રોડ?
રાજ્યના માર્ગ અને મકાન વિભાગ દ્વારા આ પ્રોજેક્ટ માટેની ટેન્ડર પ્રક્રિયા પણ શરૂ કરી દેવામાં આવી છે. આ નવા પ્રોજેક્ટ હેઠળ રસ્તાને અત્યાધુનિક રીતે તૈયાર કરવામાં આવશે, જેમાં વિવિધ સુવિધાઓનો સમાવેશ થાય છે.
- આ રસ્તાને 15 મીટર પહોળો ડામર રોડ (કેરેજ-વે) બનાવવામાં આવશે.
- બંને બાજુએ 2.5 મીટર પહોળા પેવર બ્લોક વાળા ફૂટપાથ તૈયાર કરાશે.
- રસ્તાની વચ્ચે એક સેન્ટ્રલ ડિવાઇડર પણ ઊભું કરવામાં આવશે.
- રાત્રિના સમયે સુરક્ષા માટે સોલાર પાવર્ડ સ્ટ્રીટ લાઈટ, ટ્રાફિક સાઈનબોર્ડ
- આખા રસ્તા પર સીસીટીવી (CCTV) કેમેરા પણ લગાવવામાં આવશે.
આ પણ વાંચો: પશ્ચિમ રેલવે: મુંબઈ અને ઈન્દોર વચ્ચે દોડશે AC સ્પેશિયલ ટ્રેન, દાહોદ સ્ટેશને અપાયું વિશેષ સ્ટોપેજ
દબાણ હટાવાશે, માળખાગત સુધારા થશે
અધિકારીઓએ જણાવ્યું હતું કે, આ માર્ગ પર આવતા નાના-મોટા બ્રિજ તેમજ રસ્તાની બાજુની ગટર વ્યવસ્થા (ડ્રેનેજ સ્ટ્રક્ચર્સ) ને પણ પહોળી કરવામાં આવશે. આ સાથે, જંગલ ખાતાની જમીન પર થયેલા દબાણો અને રસ્તાની બાજુના કામચલાઉ સ્ટ્રક્ચર્સને પણ દૂર કરવામાં આવશે.
આ માર્ગ પર નડતરરૂપ પાલિકાની પાણી અને સિંચાઈની પાઇપલાઇનોને પણ આ પ્રોજેક્ટના ભાગરૂપે યોગ્ય જગ્યાએ શિફ્ટ કરવામાં આવશે, જેથી ભવિષ્યમાં કોઈપણ પ્રકારની અડચણ ઊભી ન થાય. આ પ્રોજેક્ટ પૂર્ણ થતાં દાહોદના નાગરિકો અને બહારથી આવતા વાહનચાલકોને મોટી રાહત મળશે.