Anand News: ગુજરાતમાં લાંચ રુશ્વત વિરોધી બ્યુરો (ACB) દ્વારા ભ્રષ્ટાચારીઓ સામે લાલ આંખ કરવામાં આવી છે, જે અંતર્ગત આણંદમાંથી એક ચોંકાવનારો કિસ્સો સામે આવ્યો છે. આણંદ મહિલા પોલીસ સ્ટેશનની બે મહિલા પોલીસ કર્મચારીઓને એન્ટી કરપ્શન બ્યુરોની ટીમે રૂપિયા 1.10 લાખની લાંચ લેતા રંગે હાથે ઝડપી પાડી છે.
પુત્રવધૂ દ્વારા કરવામાં આવેલી એક અરજીના મામલામાં ફરિયાદી પરિવારને હેરાન ન કરવા અને પાસપોર્ટ જમા ન લેવા માટે આ મસમોટી રકમની માંગણી કરવામાં આવી હતી. આ ઘટનાને પગલે સમગ્ર આણંદ પોલીસ બેડામાં ભારે ચકચાર મચી ગઈ છે.
પુત્રવધુની અરજીને પગલે પુત્રનો પાસપોર્ટ જમા ના લેવા લાંચ માંગી હતી
આ અંગે પ્રાપ્ત વિગતો પ્રમાણે, ફરિયાદી અને તેમના પરિવાર વિરુદ્ધ તેમની પુત્રવધૂએ આણંદ મહિલા પોલીસ સ્ટેશનમાં એક અરજી સબમિટ કરી હતી. આ અરજીના સંદર્ભમાં કાયદાકીય પ્રક્રિયાના નામે ફરિયાદી અને તેમના પરિવારને માનસિક કે શારીરિક રીતે હેરાન ન કરવા તેમજ ફરિયાદીના પુત્રનો પાસપોર્ટ જમા ન લેવા માટે વચેટિયા દ્વારા દબાણ કરવામાં આવી રહ્યું હતું.
આ કેસની તપાસ વુમન હેડ કોન્સ્ટેબલ પુષ્પાબેન રણજીતસિંહ ગરાસીયા કરી રહ્યા હતા, જ્યારે વુમન ASI ગીતાબેન કમજીભાઈ દોઠાએ આ મામલો થાળે પાડવા માટે રૂ. 1.10 લાખની લાંચની માંગણી કરી હતી.
જાગૃત નાગરિકે ACBનો સંપર્ક કર્યો
લાંચની આ રકમ આપવા ન ઈચ્છતા જાગૃત ફરિયાદીએ હિંમત દાખવીને તાત્કાલિક અમદાવાદ શહેર ACB (એન્ટી કરપ્શન બ્યુરો) નો સંપર્ક સાધ્યો હતો અને સમગ્ર મામલે વિધિવત ફરિયાદ નોંધાવી હતી. ફરિયાદના આધારે એક્શનમાં આવેલી ACBની ટીમે લાંચિયા કર્મચારીઓને પકડવા માટે એક મજબૂત પ્લાન તૈયાર કર્યો હતો.
રેલવે સ્ટેશન પાસે ગોઠવાયું લાંચનું છટકું
અમદાવાદ ACBની ટીમે આણંદ રેલવે સ્ટેશન પાસે આવેલા જિલ્લા ટ્રાફિક પોલીસ ચોકીની પાછળ, રેલવે ગોદી વિસ્તારમાં લાંચનું છટકું (ટ્રેપ) ગોઠવ્યું હતું. પ્લાન મુજબ, જ્યારે ફરિયાદી લાંચની રકમ આપવા પહોંચ્યા, ત્યારે વુમન ASI ગીતાબેન દોઠાએ ફરિયાદી પાસેથી રૂ. 1,10,000ની લાંચની રકમ સ્વીકારી હતી. આ ગુનાહિત પ્રવૃત્તિ અને વહીવટમાં તપાસ કરનાર વુમન હેડ કોન્સ્ટેબલ પુષ્પાબેન ગરાસીયાએ પણ પૂરેપૂરી મદદગારી કરી હતી. રકમની લેવડદેવડ થતાં જ છુપાઈને બેઠેલી ACBની ટીમે ત્રાટકીને બંને મહિલા કર્મચારીઓને સ્થળ પર જ લાંચની રોકડ રકમ સાથે આબાદ ઝડપી પાડ્યા હતા.
ACB ટીમની સફળ કામગીરી
આ સફળ ઓપરેશન અમદાવાદ શહેર ACBના પોલીસ ઇન્સ્પેક્ટર એમ.આર. શેઠ અને તેમની ટીમ દ્વારા પાર પાડવામાં આવ્યું હતું. આ સમગ્ર ટ્રેપનું સુપરવિઝન અને માર્ગદર્શન મદદનીશ નિયામક એમ.એચ. પુવાર (ACB અમદાવાદ એકમ) તથા નાયબ નિયામક હરેશ મેવાડા દ્વારા પૂરું પાડવામાં આવ્યું હતું.
હાલમાં ACB દ્વારા બંને આરોપી મહિલા પોલીસ કર્મચારીઓ વિરુદ્ધ ભ્રષ્ટાચાર નિવારણ અધિનિયમ હેઠળ ગુનો નોંધીને આગળની કાયદેસરની કાર્યવાહી હાથ ધરવામાં આવી છે.