Unseasonal Rain Protection: તા. 29 માર્ચ - આગામી તા. 31 માર્ચ સુધી રાજ્યના વિવિધ વિસ્તારોમાં છુટાછવાયા હળવા વરસાદની શક્યતા છે. કમોસમી વરસાદની આગાહીને ધ્યાનમાં રાખીને પરિપક્વ થયેલા તેમજ ઊભા પાકને નુકસાનથી બચાવવા માટે ખેતીવાડી વિભાગ દ્વારા નીચે મુજબનાં સાવચેતીનાં પગલાં સૂચવવામાં આવ્યા છે.
સામાન્ય અને આગોતરી વ્યવસ્થા
પિયત આપવાનું બંધ કરો: તમામ ઊભા પાકોમાં હાલમાં પિયત (સિંચાઈ) આપવાનું તાત્કાલિક ધોરણે બંધ કરવું જોઈએ.
પાણીના નિકાલની વ્યવસ્થા: ખેતરમાં વરસાદી પાણી ભરાઈ ન રહે તે માટે વધારાના પાણીના નિકાલ (ડ્રેનેજ) માટે યોગ્ય વ્યવસ્થા કરવી જોઈએ.
દવાનો છંટકાવ મુલતવી રાખો: જંતુનાશક કે ખાતરનો છંટકાવ હાલમાં ન કરવો; હવામાન ચોખ્ખું થયા પછી જ આ કામગીરી હાથ ધરવી જોઈએ.
શિયાળુ પાકોનું રક્ષણ - પરિપક્વ અવસ્થા
વહેલી કાપણી અને સંગ્રહ: ઘઉં, ચણા, વરિયાળી જેવા પાકો તૈયાર હોય તો તેની તાત્કાલિક કાપણી કરી ગોડાઉન કે સુરક્ષિત જગ્યાએ ખસેડવા જોઈએ.
તાડપત્રીનો ઉપયોગ: જો પાક ખેતરમાં ઢગલા સ્વરૂપે હોય, તો તેને નીચેથી ભેજ ન લાગે અને ઉપરથી વરસાદથી બચે તેમ પ્લાસ્ટિક કે તાડપત્રીથી ઢાંકી દેવો જોઈએ.
સંવેદનશીલ પાકો પર વિશેષ ધ્યાન: જીરું, ઈસબગુલ અને વરિયાળીમાં ચરમી કે કાળિયો રોગ આવવાની શક્યતા વધુ હોવાથી તેની ખાસ તકેદારી રાખવી જોઈએ.
ઉનાળુ પાકોની સંભાળ - વૃદ્ધિ અવસ્થા
મગફળી અને તલનું રક્ષણ: મગફળી, મગ અને તલ જેવા પાકોમાં પાણી ભરાઈ રહેવાથી મૂળનો વિકાસ અટકે છે અને છોડ પીળા પડી જાય છે.
રોગ-જીવાતનું નિરીક્ષણ: વરસાદ બાદ ભેજ વધવાથી ફૂગજન્ય રોગો (મૂળનો કોહવારો) અને થ્રિપ્સ જીવાતો વધી શકે છે. તેથી, નિષ્ણાતોની સલાહ મુજબ દવા છાંટવી જોઈએ.
ડાંગરના ક્યારાનું વ્યવસ્થાપન: ડાંગરના ક્યારામાં જો વરસાદનું નવું પાણી આવે, તો અગાઉ ભરેલું જૂનું પાણી કાઢી નાખવું જરૂરી છે.