RBI Foreign Exchange Position: ભારતીય રિઝર્વ બેંક (RBI) ના એક કડક નિર્ણયને કારણે શેરબજારમાં બેન્કિંગ સેક્ટરના શેરોમાં ભારે વેચવાલી જોવા મળી રહી છે. શુક્રવારે મોડી રાત્રે RBI દ્વારા બેંકોની ફોરેન એક્સચેન્જ પોઝિશન પર મર્યાદા કડક કરવાના નિર્ણય બાદ સોમવારે 'બેંક નિફ્ટી' (Bank Nifty) 2 ટકાથી વધુ ગગડ્યો હતો.
શું છે RBI નો નવો નિયમ?
હકીકતમાં શુક્રવારે મોડી રાત્રે રિઝર્વ બેંકે જાહેર કરેલા પોતાના નિર્દેશમાં બેંકોને દરેક ટ્રેડિંગ દિવસના અંત સુધીમાં વિદેશી મુદ્રા બજારમાં તેમના શુદ્ધ ઓપન રૂપિયાના રોકાણ (Net open rupee exposure) ને 100 મિલિયન ડોલર સુધી સીમિત કરવા માટે કહેવામાં આવ્યું છે. બેંકોએ આ નિયમનું પાલન 10 એપ્રિલ સુધીમાં કરવાનું રહેશે.
રૂપિયામાં મજબૂતી આવવાના સંકેત
બેંકોની 'ફોરેન એક્સચેન્જ પોઝિશન' પર લિમિટ કડક કરવાના આ નિર્ણયથી સ્થાનિક બજારમાં ડોલરનું વેચાણ ઝડપી બન્યું છે. વેપારીઓ પોતાની આર્બિટ્રેજ પોઝિશન (Arbitrage Position) ઘટાડવા માટે ઉતાવળ કરી રહ્યા છે, જેને કારણે બેંકોને સ્થાનિક બજારમાં ડોલર વેચવાની ફરજ પડી શકે છે, અને રૂપિયામાં મજબૂતી આવવાના સંકેત દેખાઈ રહ્યા છે.
કઈ બેંકોના શેરમાં થયો સૌથી વધુ ઘટાડો?
આ નિર્ણયની સીધી અસર બેંક નિફ્ટી પર જોવા મળી છે. બેંક નિફ્ટીના તમામ 14 શેર લાલ નિશાનમાં ટ્રેડ થઈ રહ્યા છે. ઉલ્લેખનીય છે કે, છેલ્લા બે ટ્રેડિંગ સેશનમાં નિફ્ટી બેંકમાં 4 ટકાથી વધુનો ઉછાળો આવ્યો હતો, પરંતુ 30 માર્ચે ઇન્ડેક્સે બધી જ લીડ ગુમાવી દીધી હતી, અને 2 ટકાથી વધુ તૂટ્યો હતો.
AU સ્મોલ ફાઇનાન્સ બેંકને સૌથી મોટો ફટકો
નિફ્ટી બેંક ઇન્ડેક્સમાં સૌથી વધુ ઘટાડો પ્રાઇવેટ સેક્ટરની AU સ્મોલ ફાઇનાન્સ બેંકના શેરમાં જોવા મળ્યો હતો, જે 4 ટકાથી વધુ ઘટીને 845 રૂપિયા પર આવી ગયો હતો. આ ઉપરાંત, ફેડરલ બેંક અને પંજાબ નેશનલ બેંક (PNB) ના શેરોમાં પણ 2 ટકાથી વધુનો મોટો ઘટાડો નોંધાયો છે. સરકારીથી લઈને પ્રાઈવેટ બેંક સુધી તમામમાં આ નવા નિયમને કારણે ચિંતાનું મોજું ફરી વળ્યું છે.