LIC Share Price: LIC સ્ટોકમાં જોરદાર ઉછાળો: રોકાણકારો થયા માલામાલ, જાણો એવું તે શું થયું કે શેરે પકડી રફ્તાર?

LIC Share Price Rise: 6 ફેબ્રુઆરીના રોજ ભારતીય શેરબજારમાં LIC ના શેરમાં 7.42 ટકા નો મોટો ઉછાળો જોવા મળ્યો હતો, જે તેને ₹902.1 ના સ્તરે લઈ ગયો હતો. આ વધારો 3 ફેબ્રુઆરી પછીનો સૌથી મોટો ઇન્ટ્રાડે ઉછાળો માનવામાં આવે છે. સવારે ટ્રેડિંગ સત્ર દરમિયાન LIC ના શેર 7 ટકાથી વધુની તેજી સાથે ટ્રેડ થઈ રહ્યા હતા, જેની સામે નિફ્ટી 50 માં માત્ર 0.41 ટકાનો નજીવો વધારો જોવા મળ્યો હતો. આ વર્ષે અત્યાર સુધીમાં LIC ના શેર 4 ટકા વધ્યા છે, જ્યારે તેની સરખામણીએ નિફ્ટી 50 માં 2 ટકાનો ઘટાડો થયો છે.

Q3 ના પરિણામો: નફા અને પ્રીમિયમ આવકમાં તોતિંગ વધારો

LIC એ ડિસેમ્બર ક્વાર્ટર (Q3FY26) ના અત્યંત મજબૂત પરિણામો જાહેર કર્યા છે, જેના મુખ્ય બિંદુઓ નીચે મુજબ છે:

• ચોખ્ખો નફો: કંપનીએ તેના એકીકૃત ચોખ્ખા નફામાં વાર્ષિક ધોરણે 17.5 ટકાનો વધારો નોંધાવ્યો છે, જે વધીને ₹12,930 કરોડ થયો છે. ગયા વર્ષના સમાન ક્વાર્ટરમાં આ નફો ₹11,008 કરોડ હતો.
• ક્રમિક વૃદ્ધિ: જો અગાઉના ક્વાર્ટર (Q2) સાથે સરખામણી કરવામાં આવે તો નફામાં 28.04 ટકાનો નોંધપાત્ર વધારો થયો છે.
• પ્રીમિયમ આવક: ચોખ્ખી પ્રીમિયમ આવક 17.76 ટકા વધીને ₹1.26 લાખ કરોડે પહોંચી છે.
• પ્રથમ વર્ષનું પ્રીમિયમ: નવા પ્રીમિયમ કલેક્શનમાં 45.2 ટકાનો જંગી વધારો નોંધાયો છે, જે કંપનીના આક્રમક ગ્રોથ અને બજારમાં પકડને સૂચવે છે.

માર્કેટ કેપ અને વેલ્યુએશન

LIC ની કુલ માર્કેટ કેપ આશરે ₹5,70,578 કરોડ (ઇન્ટ્રાડે હાઈ મુજબ) પર પહોંચી ગઈ છે. શેરનો PE રેશિયો 10.76 છે, જે સેક્ટરના અન્ય ખેલાડીઓની સરખામણીએ રોકાણકારો માટે આકર્ષક સ્તર ગણાય છે. છેલ્લા એક સપ્તાહમાં જ આ શેરમાં અંદાજે 9.88 ટકાનો વધારો જોવા મળ્યો છે.

સરકારી હિસ્સો અને ભાવિ વેચાણ (Disinvestment)

હાલમાં LIC માં ભારત સરકારનો હિસ્સો 96.5 ટકા છે. મે 2022 માં જ્યારે LIC નો IPO આવ્યો હતો, ત્યારે સરકારે 3.5 ટકા હિસ્સો વેચીને ₹21,000 કરોડ એકત્ર કર્યા હતા.

મહત્વનો નિયમ: સેબી (SEBI) ના લિસ્ટિંગ નિયમો મુજબ, કોઈપણ લિસ્ટેડ કંપનીમાં ઓછામાં ઓછું ૧૦ ટકા પબ્લિક (જાહેર) શેરહોલ્ડિંગ હોવું અનિવાર્ય છે. આ નિયમનું પાલન કરવા માટે સરકારે મે 2027 સુધીમાં LIC માં વધારાનો 6.5 ટકા હિસ્સો બજારમાં વેચવો પડશે. આનાથી આગામી સમયમાં બજારમાં વધુ લિક્વિડિટી જોવા મળી શકે છે.