Gold Price In India: ભારતીય સોનાના બજારમાં હાલમાં ભારે અફરાતફરીનો માહોલ જોવા મળી રહ્યો છે. એક તરફ મલ્ટી કોમોડિટી એક્સચેન્જ (MCX) પર સોનાના ભાવમાં ઐતિહાસિક ઘટાડો નોંધાયો છે, તો બીજી તરફ વૈશ્વિક ઇન્વેસ્ટમેન્ટ બેંક જેપી મોર્ગનના રિપોર્ટે રોકાણકારોમાં નવી આશા જગાડી છે. અત્યારે ખરીદદારો મૂંઝવણમાં છે કે આ ઘટાડો ખરીદીની તક છે કે પછી વધુ મોટી મંદીનો સંકેત.
MCX પર ભાવમાં મસમોટો ઘટાડો
ભારતીય વાયદા બજારમાં સોનાના ભાવમાં મોટું ગાબડું પડ્યું છે. એપ્રિલ 2026ની ડિલિવરી વાળું સોનું 18 ટકાના જંગી ઘટાડા સાથે ₹1,50,849 પર બંધ થયું હતું. માત્ર એક જ સત્રમાં કિંમતમાં ₹33,112નો કડાકો બોલાયો હતો. તેવી જ રીતે ફેબ્રુઆરી વાયદામાં પણ 12 ટકાનો ઘટાડો નોંધાતા ભાવ ₹1,49,075ની સપાટીએ પહોંચી ગયા હતા. આ આકસ્મિક ઘટાડા પાછળ જોરદાર નફાખોરી (Profit Booking) જવાબદાર માનવામાં આવે છે.
જેપી મોર્ગનનો આશાવાદી રિપોર્ટ: ₹2.35 લાખનો લક્ષ્યાંક
બજારમાં ચાલી રહેલી આ મંદી વચ્ચે અમેરિકન બેંક જેપી મોર્ગન (J.P. Morgan) ના રિપોર્ટે હલચલ મચાવી દીધી છે. બેંકના ગ્લોબલ માર્કેટ સ્ટ્રેટેજિસ્ટ નિકોલાઓસ પનિગિર્ટઝોગ્લુના જણાવ્યા અનુસાર, વર્ષ 2026 ના અંત સુધીમાં સોનાની કિંમત 8,000 થી 8,500 ડોલર પ્રતિ ઔંસ સુધી પહોંચી શકે છે. જો આ કિંમતને ભારતીય રૂપિયામાં રૂપાંતરિત કરવામાં આવે, તો તે ₹2,35,807 પ્રતિ 10 ગ્રામ જેવી ઐતિહાસિક સપાટીએ પહોંચી શકે છે.
સોનું હવે 'સેફ હેવન'થી આગળ 'કોર એસેટ' બન્યું
રિપોર્ટમાં જણાવ્યા મુજબ, રોકાણકારો હવે સોનાને માત્ર મુશ્કેલીના સમયના રક્ષણ તરીકે નહીં, પરંતુ તેમના રોકાણ પોર્ટફોલિયોની મુખ્ય સંપત્તિ (Core Asset) તરીકે જોઈ રહ્યા છે.
- પોર્ટફોલિયો હિસ્સેદારી: હાલમાં ખાનગી રોકાણકારો તેમના પોર્ટફોલિયોનો 3% હિસ્સો સોનામાં રાખે છે. જો આ હિસ્સો વધીને 4.6% થશે, તો સોનાની માંગમાં અભૂતપૂર્વ ઉછાળો આવશે.
- સપ્લાયની અછત: નવી ખાણોમાંથી સોનાનો પુરવઠો મર્યાદિત છે અને વિશ્વની કેન્દ્રીય બેંકો સતત સોનાની ખરીદી કરી રહી છે, જે કિંમતોને ટેકો આપશે.
- બોન્ડ્સથી દૂરી: રોકાણકારો હવે સરકારી બોન્ડ્સથી દૂર જઈને સોના તરફ વળી રહ્યા છે કારણ કે સોનું કોઈ પણ સરકારની જવાબદારી (Liability) નથી.
બિટકોઈન કરતા સોના પર વધુ ભરોસો
રસપ્રદ વાત એ છે કે, છૂટક રોકાણકારો આર્થિક જોખમો સામે રક્ષણ મેળવવા માટે બિટકોઈન કરતા સોનાને વધુ પ્રાધાન્ય આપી રહ્યા છે. બિટકોઈન તેની અસ્થિરતાને કારણે ટૂંકાગાળાના ટ્રેડિંગનું સાધન રહ્યું છે, જ્યારે સોનામાં સ્થિર અને લાંબાગાળાનો પ્રવાહ જોવા મળી રહ્યો છે.
અર્થશાસ્ત્રીઓની ચેતવણી
જાણીતા અર્થશાસ્ત્રી પીટર શિફે ચેતવણી આપી છે કે શેરબજારની તેજી મોંઘવારીને કારણે છે. જો શેરબજારને સોનાના મૂલ્યમાં માપવામાં આવે, તો ચિત્ર નબળું દેખાય છે. તેમના મતે, આગામી સમય શેરો માટે 'બિયર માર્કેટ' સાબિત થઈ શકે છે, જ્યારે અસલી મજબૂતી સોનામાં જોવા મળશે.
અત્યારે સોનાના ભાવમાં આવેલો ઘટાડો લગ્નની સિઝન માટે દાગીના ખરીદનારાઓ માટે વરદાન સમાન છે, જ્યારે જેપી મોર્ગનનો રિપોર્ટ સૂચવે છે કે લાંબાગાળાના રોકાણકારો માટે આ 'સોનેરી તક' હોઈ શકે છે.